Aizawl Mihlun Thlahte chuan, Aizawla piang leh seilian zinga kum upa, kum 90 chin chunglam te hlutpuina programme an kalpui mek a, vawiin hian tunhnaia kum 90 tling thar – Pi Neihthangi Zote Bakery, Pi Sailothangi Sailo Zarkawt te leh Pu K. Lalchhuana, Kulikawn te hnenah hlutpuina thuziak an hlan. Aizawl Mihlun Thlahte chuan kum lama upa te chu kan hnam rohlu an nih avangin; chawimawi an phu hle tih chu an ngaihdan anih thu leh hmasang atangin kum upa te zahna lantir chu Mizo khawtlang nuna bet tlat anih avangin; kum upa te chunga zahna lantir leh chawimawi chu chhawm nun zel tula an hriat avangin leh thangthar te pawhin an lo hriat zawm zel nan; kum upa te hlutpuina hun hi buatsaih anih thu an tarlang a, Mizorama kum upa zawng zawng te zahna chibai an buk. Tun dinhmunah Aizawla piang leh seilian, kum 90 chin chunglam mi 20 an awm mek a, an zinga upa ber chu Pi Buangi kum 108 mi niin Khatla ah a khawsa mek a ni.
