Vawiin khan Lunglei High Powered Committee Vice Chairman Lawmawma Tochhawng chuan HPC Fund cheng nuai 13.86 senga sak Kau Lui Suspension Bridge, Saithah Zau panna chu Zawlpui, Lunglei District ah a hawng.
Hawnna inkhawm A. Vanliana, VCP Zawlpui kaihhruaiah Lunglei HPC Vice Chairman Lawmawma Tochhawng chuan Zawlpui leh a chhehvel khaw mipui te mamawh em em, Kau Lui Suspension Bridge chu HPC Lunglei kaltlanga tih hlawhtlin a ni ta chu lawmawm tiin tangkai taka hman ngei anih theihnan mipuite duhsakna a hlan a. HPC Lunglei thil tum pawimawh ber chu ei leh bara kawnga kan intodelha, phai lam atanga kan thil lakluh hnem lutuk tih hniam a ni tiin Kau Lui Suspension Bridge chu hemi kawnga hmanraw pawimawh tak ala nih ngei a beisei thu a sawi a. Zawlpui chu Lunglei District-a khaw taima leh thlai tharchhuak hnem, Lunglei bazar chawm bertu an ni chu an chhuanzawm takzet a ni tiin hun lo kal zel turah taima taka hmalak chhunzawm zel tur leh an khuaa hmasawnna ruhrel thar awm chu uluk leh fimkhur taka enkawl turin a chah a. Kuthnathawktute hmasawnna turin HPC Lunglei chuan theihtawp chhuah zel a tum a ni tiin hmasawnna tura an mamawhte HPC ah thlen hreh lo turin a chah.
Program ah hian Lunglei HPC Member leh he hnaa work supervisor ni bawk H.Lalthansanga chuan Technical Report a pe a. Kau Lui Suspension Bridge hi HPC Lunglei fund cheng nuai 13.86 senga sak niin Lei thui zawng hi feet 420 leh a vang zawng hi feet 4 a ni a, Departmental a hna thawh a ni. He lei, Saithah Zau panna hi Zawlpui kuthnathawktute tana pawimawh tak niin helaia lei hmasa hi kum 2017 khan tuilianin a ti chhia a ni. Saithah Zau ah hian kuthnathawktu thahnem takin hma an lak bakah Tuisen leh Bolia nena inkalpawhna pawimawh tak a ni bawk.
