MNF Returnee tena Mau tiak an phunna hmun Lengte leh Saitlaw ram chu nimin khan MPYCC Information & Publicity Deptt te chuan an tlawh a, “Chanchinthara an lo puanzar tawh ang leh an insawi angin heng lai hmunah hian Mau puitling hmuh tur a awm miah lova, a thlawna Sawrkar sum luanralna leh sum siamna chiang tak tih MPYCC chuan kan finfiah a, he project hi a hlawhchham let der a ni tih kan puang a ni,” an ti.
Thuchhuahah chuan, “RTI Act hmanga zawhna Horticulture department-in an chhàn danin, mau/raw ṭiak chi thum phun tir a ni a. kum 2020 aṭangin loneitute hnenah mau/raw ṭiak 8,49,425 an sem tawh a, a ṭiak leina atan cheng vbc. 6.48 an sên tawh bakah link road laihna atan sum engemaw zat sen a ni bawk a. Heti chunga mau puitling tha pakhat mah an siamna hmuna an sawi Lengte leh Saitlaw ramah hmuh tur a awm miah lo chu MPYCC chuan mak kan ti em em a. Sawrkar sum awmze nei lova luanralna dik tak a ni.
“A hunbi-a sawrkar hnathawk hlawh pawh pek theih a nih lo thin lai leh, CSS etc hnuaia thawkte thlabi hlawh pek that loh thin te, Tar pension leh rualbanlo (Vohbik) te lawmman pawh an batsak laia hetianga Sawrkar sum ho lam taka a luangral hi MPYCC chuan vanduaithlak kan ti hle a. MPYCC ten kan lo sawi fo tawh thin angin sum enkawl thiam lo Finance Minister Mizoram-in kan neih a pawizia a lo lang leh ta tihna a ni a. Chuvangin, MPYCC chuan hetianga sum khawhralna project a hi a hlawhchham let der tih Zoram mipui hriatah kan puang a. Tunhnuah hetiang project lem, tihhlawhtlin tumna tak tak awm lo hi kalpui ngai tawh lo tur leh sum siam nan maia Sawrkar pawisa te hi hmang tawh lo turin MPYCC chuan MNF Sawrkar hi kan chah tak meuh a ni,” an ti bawk.
