MPYCC chuan vawiin khan thu chhuah siamin, “Tun hnaiah Mizoram Sorkarin chhiah a lak luh a pun nasat zia leh hma kan sawn nasat zia a lawmawm thu sawi lan a ni a. Chhiah petu Mizoram mipuite, sumdawng leh adt ten rinawm taka chhiah an pe zel tih kha kan Taxation Minister khan a sawi a, mipui lam chuan an tih tur an ti. Sorkar lamin a tih tur a tih ve thung a ngai kan ti a ni,” an ti.
Thuchhuahah chuan, “Diesel leh Petrol Tax hmanin mipui min sawr fu mek a. Electric Bill mi tam zawk tan phurrit ni khawpin an san mek a. Health Care atan mipuiin sum an thawh ve tur pawh a bin thawk thawkin an pun a. Property tax-te pawh tih san zel a ni. Mipui hi sorkar hian min sawr fu tak meuh meuh a ni.
“Ha hipin Taxation Minister-in ti tha a in tih lai mekin Mizoram mipuite kan rum mek thung.
“Pensioner ‘pension’ la thei lo tam tak an awm a, GPF withdraw thei lo, Health Care atan premium a hun taka pe si, mahse an bill la tang mi sang tel an awm a ni. Mizoram mipui an rum tak meuh meuh ani.
“Nimin piah lawkah pawh Airport Runway a chhiat thu kan hria a. Congress Thalaiin thu kan hriat danin nikum July thla atangin ‘maintainance fund’ an dawng tawh lo va, estimate-te siamin ‘maintainance fund’ hi vawi engngemaw zat dil tawh a ni a. Mahse hnawl zel a ni. Runway ngaihthah anih laiin, Airport Cute siam nan erawh hna thawh mup mup reng a ni a. Tender lova hna pek a la ni zel zui bawk. Mizoramin kan hrawn mek sorkar hian mipuite min hlawhchham pui nasat zia a lang chiang hle.
“Kan state-in sum a pawh luh a tam tual tual laiin, a enkawlna lamah kan sorkar hi a hlawhchham em avang leh, a duhsak zawngte tih lawm nan Non Plan Expenditure a san lutuk avangin Mizoram mipuite sum tur hi mipuiah a thleng pha tawh lo a ni,” an ti bawk.
