All Mizoram Petroleum Dealers’ Association (AMPEDA) president Lalnghakliana chuan, “Chawlhkar kalta Inrinni tlaia tank lorry chesual avanga mi pali thihna leh mi tam takin hliam an tawrh phahna chu Mizo mipuiten fimkhur phah nan hmang se kan duh tak zet a ni,” a ti.
Vawiin khan AMPEDA hruaitute chuan Aizawl Press Club-ah chanchinthar lakhawmtute kawmin, Lalnghakliana chuan, “Oil phurte hi ni dangah pawh an la chesual leh lovang tih sawi theih a ni lova, hetiang hi a thleng leh a nih chuan a bul hnaiah awm miah loh tur a ni,” tiin, “Mi chhiat tawhna kara petrol lo dawh a, mi mimal bungrua lo inchuh kha a zahthlakin a Kristian lo em em a, hetiang thil hi a tleng leh a nih chuan pawl ang pawhin FIR thehluh zel a ni tawh ang,” a ti bawk.
AMPEDA hruaitute chuan, kar kaltaa tank lorry-in petrol a phurh kha litre 22,000 vel a nih thu leh, a motor kangchhe ta pawh kha motor thar nuai 40 man vel a nih thu an sawi a. Ramsanga Filling Station Champhaia dah tur a ni a. A driver pawh a rui ngei nia an hriatthu sawiin, a chetsual tirh hian Police-ah pawh report nghal a ni a, amaherawh chu, mipuite hau darh tur hian Police te hi an thleng hma nge hma lo an hriat loh thu an sawi.
AMPEDA hruaitute chuan, petrol la tura kal ten meizial zuk an ching chu sim thei se an duh tih an sawi bawk.
