Aizawl, May 10 : Aizawl District Disaster Management Authority (ADDMA) chuan May thla chhungin Aizawl khawpui chhunga veng hrang hranga Local Level Disaster Management Committee (LLDMC) te tan chhiatrupna/khuarel chhiatna a thlen palh a chet lak dan chungchangah training hrang hrang buatsaih turin hma an la mek a. Vawiin khan Aizawl DC Dr. Lalhriatzuali Ralte, Chairman ADDMA ni bawk chuan Chanmari YMA Hall ah Zone I – VIII chhunga veng hrang hranga LLDMC te tan training an buatsaih chu a hmanpui.
Dr. Lalhriatzuali Ralte chuan Aizawl District Disaster Management Authority (ADDMA) hmalakna leh hmachhawp hrang hrangte sawiin khuarel chhiatna a thlen palha mawhphurtu hrang hrang ten rang taka chet an lak dan tur ruahmanna Incident Response System (IRS) chu Aizawl District tan din a nih tawh thu a tarlang a. Hripui a len hma in School safety program kaltlangin Aizawl khawpui chhung a school 50 a zirtirtute zirtirna pek an nih bakah school hrangah awareness programme leh evacuation drill te neih a nih thu te pawh a sawilang a ni.
Aizawl DC chuan khuarel chhiatna a lo thlenin a tuartute hnenah DDMA in SDRF kaltlangin tanpuina awm ang ang te an pek dan te pawh sawiin Aizawl District huam chhunga Covid-19 vanga boral chhungte hnenah ex-gratia tanpuina mi 349 hnenah pek a nih tawh thu te leh fund dawn leh hunah tuna dilna dawn sa mi 27 te hnenah pek leh anih tur thu te pawh a tarlang a .CSR atanga fund hmuh atanga sak Makeshift CCC pawh sak zawh ni tawhin, Health & Family Welfare Department kuta hlan turin ruahmanna siam mek a ni, a ti a. Veng hrang hranga tlawmngai pawl abik takin Local Level Task Force (LLTF) te hnena hripui dona kawnga Sawrkar an thawhpui dan leh an hmalaknaah lawmthu a sawi bawk a ni.
Vawiina training ah hian mithiam hrang hrang ten zirtirna pe in zawhna leh chhanna hun te hman a ni a. Naktukah he training hi a hmun ngaiah Zone IX – XIV huam chhunga LLDMC te tan buatsaih a ni leh dawn a ni.
Hemi kaihhnawihah May ni 5 khan ADDMA chuan Aizawl SP Conference ah Zonal Officer te tan training ‘Training of Trainers (Zonal Officers)’ a buatsaih a. May ni 17 leh 20 inkarah tui tla te rang taka zawnchhuah leh chhanchhuah chungchanga zirtirna hmun hnihah an buatsaih dawn a. May ni 23 leh 27 inkarah khian 5th IR Battalion Lungverhah building chimin a delh te zawnchhuah leh chhanchhuah chungchanga training neih a dawn bawk a ni.
