Mamit District Agriculture Office atanga thudawn danin loneitute buh bal ei chhetu tunlaia Sazu puang mek chu, Raw tam vang nia hriat a ni a. Mamit district chhung a bik takin W Phaileng leh Reiek BDO huam chhunga mi ten an tuar nasa a, a bik takin Tuirum, Damparengpui, Lallen, Kawnmawi, Hreichuk leh Khawrihmim khua ten an tuar nasa zual a, buh seng tur neilo an awm nual a, tunhnaiah Khanthuam khuaah sazu hi puang nasa leh in chhungkaw 11 te buh a ei chhiat sak leh a. Ti hian Mamit district chhunga Sazu puang vang hian Mamit district chhunga khaw 20 a chhungkaw 654 te lo hactare 258.3 zau a chhe tawh a ni.
Mamit DAO chuan, “Tun a sazu puang te hian buh thar rang chi tai buh leh vaimim a ei chhe nasa ber a, tun dinhmunah chuan buhpui la ei chhe lo mahse a ei chhiat leh rin a ni a. Mamit district Agriculture department hmalakna in sazu puanna zau thenkhatah te sazu hrai runpui neih chhoh mek niin, sazu hrai dan tur inzirtirna te neih a ni a. Sazu suat nan Sazu tur te sem zel a ni a, a theih ang angin sazu puang zel tur hi ven a ni,” a ti.
