Dy Chief Minister Tawnluia chuan MNF flagship programme SEDP ah chhungkaw sing 6 Zoram pumah pek tur a ni a, vawiin ni a la chang lote pawhin kan chan tur kha a lo kal leh zel dawn a ni ati. Hrileng avangin kan sorkar tirh atanga kum thumnaah SEDP kan kengkawh thei chauh a, chuvangin kan hun neih hi a tawi lutuk a, SEDP hmanga Zoram khaichhuahna programme chu MNF in a tawp thlenga kan kenkawg theihna turin inthlan leh lo awm turah pawh Zoram mipuiten MNF party thlan tlin leh tumin hmuntinah MNF an rawn zawm chur chur a ni, a ti.
Vawiin khan Tuichang South Block MNF chuan Block Conference leh mithar lawmluhna Khawhai Town Hall-ah an nei a, MNF Vice President leh Deputy Chief Minister ni bawk Tawnluia chuan khuallian niin a hmanpui, Dy.CM chuan Socia-Economic Development Policy (SEDP) chungchang sawiin, SEDP hi policy a ni a, chumi hnuaiah chuan peng hrang hrang awmin chu chu programme a ni a, Covid hripuiin min tihbuai avangin kum 2 chhung SEDP hi kan kalpui thei lova, amaherawhchu kan sorkar tirh atang khan SEDP hi a kal reng a, SEDP hnuaia kan programme pakhat chhungkaw tin khaichhuahna tura kan duan a ni a, chu chu MLA bial tinah mi 1500-in kan sem rual a, khang kan beisei thlan ho kha tun thla tawpah hian SEDP committee an thu ang a, chumi hnua CM approval kan lak leh chuan July thla chhung hian DC tin hnen atangin pawisa hi kan sem chhuak thei tawh turah ka ngai a ni, a ti. An dawn tur zat hi cheng singnga a ni a, nakumah athawh hnihna kan sem leh dawn a, chuvangin ‘ka chang ve dawn lo’ tihna chi a nilova, tum hnih atan tih a ni ang, a ti.
Tawnluia chuan, kum danga sorkar laipuiin state tina an pek thin cheng vaibelchhe 3000 chu covid avangin min pe thei lova, Mizoram chuan kan hmuh tur ang pawisa kan hmu thei lo a, Chutianga sum harsatna awm chung chuan kan CM zarah Zoram pumah kan hmalak hi a tam em em a. Amaherawhchu chutiang karah chuan duhthusam tawk lo pawh a awm ani tih hi mipui pawhin an zep bik lo a ni. Pu Zoramthanga kaihhruai MNF sorkar chuan District thar pathum (3) kan hlang kai a. Chuvangin, Zoram mipui pawhin kan thutiamah kan ding a ni, tih hi an hria a, MNF party-in kan au hla kha a takin a zarzo theia kan awm hi MNF hi pathianin min hruai zel a ni, a ti.
