Mizoram University Department of Political Science buatsaihin vawiin September 16, 2022 hian Dean’s Multipurpose Hall, School of Social Sciences, MZU-ah ‘Political Talk’ buatsaih a ni a. He hunah hian MPCC President Pu Lalsawta chu Speaker a ni.
Pu Lalsawta chuan, “Chhura Chengkek lo tur, Nahaia a nih loh vanga lo thei lo emaw inti tlat ang deuh khan ram dangin an tih theih hi Chhura emaw intiin ti thei ve loah kan in ngai tlat thin a. He kan rilru puthmang hi siamthat a hun tawh takzet a ni. Chhura emaw inti tlat thin Mizoram mipuite hian Sorkar Tha hi kan siam ve thei reng a ni tih kan hriat a ngai. Hnam tinin Ram leh Mipui kan nei vek a, heng thil pahnih enkawl tha apiang hian ram ralmuang, him leh hausa an siam thin. Environment humhalh leh mihring rilru leh nunphung a tha zawnga hruaite hi ram leh hnam hmasawn nan a pawimawh em em bawk. Hmasawn kan duh avang hian kan environment hi a chhe kher tur a ni lo, environment humhalh chungin hmasawnna kan kalpui tur a ni. Chutiang bawkin kan chhungril nun a chhiat miau chuan hma sawn eng ang mah ila awmzia a awm chuang lo. Chuvangin, mihring rilru leh nunphung siamthat hi ram hruaituten kan tum ngei ngei tur a ni,” a ti.
“Hmasawn tur chuan sorkar tha (good governance), dan rorelna (rule of law) a pawimawh em em a. Rom sorkar, Nero a rorel lai chuan Nero-a rilru ang ang kha dan a ni ringawt a, a kutzungpui tih pir leh tih pir loh a zirin Gladiator te an thi a, an nung mai thin, chu chu ‘Rule of Thumb’ an ti. Bihar-ah Laloo-a rorelna hnuaiah dan rorelna (rule of law) a awm lo a, Nitish Kumar-a hnuaiah chuan dan ang taka rorelna awmin, nasa takin hma an sawn phah ta reng a ni. Tin, sorkarin engkim tih a tum hian a buaithlak a, sumdawng emaw a intih phei chuan buaithlak tak a ni thin. Hmasawn kan duh chuan mithiam leh nachang hria, a thiam leh a ti theite kutah thil tam tak kan dah ngam tur a ni,” a ti bawk.
Pu Lalsawta chuan, “Ram hmasawnna atan chuan Management, inenkawlna tha hi a pawimawh ber. Ram hmasawn leh hmasawn lo pawh hi Management that leh that loh vang mai mai a ni. Mipui hi chhiah petu kan ni a, sorkar chu kan chhiah pek tlingkhawm hmanga hmasawnna hna thawktu a ni thung. Mipuiten kan chhiah pek tlingkhawm hmanga sorkar inenkawl dan hi ngun taka kan vil a pawimawh a ni.
Pu Lalsawta chuan Sorkar tha siampuiah zirlaite sawmin, “Mizoram tihmasawn tur leh Sorkar Tha siam tur hian engmahin min dal lo. Kan ram hi Mizoram a nih angin Mizote chauh lo chuan kan chhanchhuak thei hek lo. Mipui hi kan tanrual a, duhamna laka kan fihlim phawt chuan kan ram hi kan siamtha thei. Min hmangaih vang ni miah lo, anmahni inhmangaih vang mai mai a kan vote lei tumtute hi kan hnawl ngam a ngai a ni. Chutiang taka ram siamthat tumna nena mitinin chet kan lak ngam phawt chuan Mizoram hian hma a sawn em em ang, Sorkar Tha hi kan siam em em ang,” a ti bawk.
Political Talk hi Dr. Lallianchhunga, HoD, Political Science Department-in a kaihruai a, Prof. Jangkhongam Doungel-in inlawmna thu sawiin, Dr. JC Zomuanthanga, Faculty, Deptt. of Political Science-in lawmthu a sawi bawk. Pu Lalsawta leh MZU zirlaite hian inkawmhona leh zawhna leh chhanna hun hlimawm tak an hmang zui nghal bawk a ni.
