Mizoram Chief Minister hlui leh MNF President ni bawk Pu Zoramthanga chuan nimin, May ni 10 Inrinni khan Kaladan Multi-modal Road, Zorinpui leh Myanmar ram chhung engemaw chena thui a tlawh a. He kawng dinhmun hi a hmunah kalin a enfiah a ni. Pu Zoramthanga hi Er R Rohmingliana MLA leh MNF hotu ṭhahnem takin an ṭawiawm a ni.
Chief Minister hlui Pu Zoramthanga chuan, “Mohammad Yunus, Bangladesh hotupa thusawi avang leh khawvel inher zelin a ken tel avangin Kaladan Multi-modal Road hi tun hma aiin a let tam takin India hian a ngai pawimawh tawh a. He kawng pawimawh tak hi Mizo mipui tan malsawmna nasa zawk thlentu a nih thuai ka beisei,” a ti.
Pu Rama chuan, “Bangladesh sorkar a inthlak a, Muslim firfiakin ro an rel mek a. Mohammed Yusuf China zin hawin India hmarchhak state 7-te India nen an inzawmna awm chhun, Siliguri-a km 20 bawr vel lek khu India leh NE inzawmna awmchhun a ni. Tuipuia inkalpawhna North East-in a dang an nei lo. China leh Bangladesh ṭangkawpin hma kan la dawn a ni, a ti a. Chu thu a sawi chuan India a ti meng phar awrh a. Hei hian Akyab chhun tura tih Kaladan Multi-modal Road pawimawhna a lo lang ta chiah a ni. He lam kawng hi a tlang chak a ngai ta tih India sorkar hian a hrechiang ta hle a ni. Zoram leh KMTTP road hi NE leh India lakah a pawimawh ta em em a ni. He thil lokal mekah hian MNF bawk a pawimawh tih India hian a hria a. Pathianin a hun takah MNF hi min tungding leh dawn a ni,” a ti.
MNF President chuan, Kaladan Multi-modal Road a hlawhtlin thuai theih nan theih tawp chhuah a tum thu a sawi a. “Myanmar leh Bangladesh a buai poh leh hnam thuthlung neitu MNF te chu chawisanin a awm zel a ni,” a ti bawk.
MNF President hian Darnamtlang khuaah MNF party zawmthar Voters 100-te chu MNF-ah a lawmlut nghal a. Lawmluh zingah hian Darnamtlang VC Member nilai pahnih (2)an tel. Lawmluhte hi ZPM mi leh sa te vek an ni.
