Aizawl, May 9 : Mizoram Legislative Assembly kum 50 tlin Golden Jubilee lawmna kal mekah vawiin khan Assembly House Annexe Conference Hall-ah Seminar buatsaih a ni a. Chief Minister Pu Zoramthanga chu khuallian a ni.
Chief Minister chuan Golden Jubilee pual a seminar hlawkthlak tak mai buatsaih a ni a, legislator lo ni tawh leh ni mek thahnem tak an kalkhawm thei chu lawmawm a ti a. Kum 50 chhunga Legislative Assembly kalphungah hmasawnna nasa tak a awm chu lawmawm a tih thu leh, felfai tak a rorelna kalpui a ni thin te, house rorelna chhunga ri buai buai thil tha chhuak chuang silo hmuh tur a awmlo te chu entawntlak a tih thu a sawi a. Tun dinhmun hi duhtawk mai tur erawh a nih loh thu sawiin Chief Minister chuan jubilee dang pawh Mizoram Legislative Assembly chuan a la hmu leh zel turah beisei chungin, house activity ah hmasawn zelin, hmasawn zelna tur leh zir belh zel tur a awm tih hria in Zoram tan ro tha hnutchhiah theih nan Golden Jubilee hi hmasawn zual zel tumna hun lo ni se, a ti a ni.
Speaker Pu Lalrinliana Sailo chuan he programme hi a kaihruai a. Dr. Kenneth Chawngliana, Ex-Speaker in “Ram hmasawnna tluantling nei tura Legislature-te pawimawhna” tih paper a present leh Pu H. Lalrinawma, Commissioner & Secretary, Mizoram Legislative Assembly in “Legislature leh Executive inlaichinna” tih paper a present te chu ngaihtuahho a ni.
He seminar-ah hian MLA te, Former Legislators Association of Mizoram (FLAM) member-te leh sawrkar a hotu pawimawh te an tel a ni. Mizoram Legislative Assembly kum 50 tlin pual hian kumin March thla khan TV ah Talk-Show te lo buatsaih tawh niin, April thla khan discussion programme-te, Youth Parliament competition te lo buatsaih a ni tawh bawk a Ni 4.5.2022 khan Golden Jubilee Exhibition buatsaih a ni bawk.
Zanin hian Larsap Dr. Hari Babu Kambhampati hovin cultural programme neih a ni ang a. Naktuk hian Assembly Special Session neih a ni ang.
