Chief Minister Zoramthanga kaihhruaiin, vawiin khan CM Office Conference Hall-ah State Level Narcotics Coordination Centre (NCORD) meeting neih a ni. Committee hi ruihhlo do kawnga department leh pawl hrang hrang khaikhawmtu coordination committee sang ber a ni a. Ruihhlo tawlh leh hmansual do kawnga awmze nei zawk leh ngawrh zawka hma lak a nih theih nan a he committee hi din a ni.
Meeting-ah hian Narcotics Control Bureau, Mizoram Police, Excise & Narcotics Department, Social Welfare & Tribal Affairs Department leh Assam Rifles te’n an hmalakna theuh presentation an pe a. Agenda hrang hrang sawiho zui niin, chung zingah chuan inzirtirna leh hrilhhriatna kalpui zel chungchang te, training pek te, Narcotics Control Scheme leh National Fund for Control of Drugs Abuse (NFCDA) atanga sum hmuh hman dan vil leh adangte a tel a ni.
Chief Minister chuan Mizoram chu ram dang dep a awm, ruihhlo tawlhna kawng a nih avangin ram leh mipui tan ngawrh taka tha thlah lova a do hna kan thawhho a ngai a ni, a ti a. Harsatna hrang hrang awm mahse mawhphurtu department leh pawl te kan zawn theuhna hna awm chu theihtawp chhuahin thahnemngai taka hma kan lak hmasak phawt a tul a ni, a ti a. Nasa zawka inhrilhhriatna kalpui pawimawh a tih thu sawiin, a bik takin zirna in ah awareness kalpui chhunzawm zel ni se, a ti a. Ruihhlo tawlh do kawngah pawh intelligence system tha zawk neiin, sawrkar leh tlawmngai pawl leh mipui thawhhona tha tak nen tha thlah lova hma lak tul a tih thu Chief Minister chuan a sawi a ni.
Chief Secretary Dr. Renu Sharma chuan State Level (NCORD) hna tlangpui leh a pawimawhna tarlangin, state chhunga ruihhlo dinhmun enfiah te, ruihhlo do leh ruihhlo ngaite enkawlna kawnga thawkte thuam that te a tel thu a sawi.
Devesh Chandra Srivastva, DGP chuan member tinte chungah hmalakna tha tak an neih ho theih zel avangin lawmthu a sawi a. Ruihhlo do hna chu Mizoram Police in a ngaihpawimawh ber zing ami a nih thu sawiin, kumin chhunga ruihhlo an man leh awareness pek kawnga an hmalakna hrang hrangte report a pe a ni.
Social Welfare and Tribal Development Department chuan zirlai naupang zinga drug survey an neih chungchang leh hmalakna dangte report an pe a. India rama state-te zinga naupang drug survey nei hmasa pawl an nih thu sawiin, zirna in 122 a zirlai 10,773 survey zingah vaihlo, zu, cannabis, inhalants, heroin, opioids, sedatives leh opium vawi khat tal ti tawh leh survey an lak laia a hma thla thum chhunga lo hmang tawh (an vawikhatna ni lo) te zawh a nih thu tarlan a ni a. Middel School, High school leh Higher secondary school naupangte an zingah survey hi kalpui a ni a. Middle school naupang zingah pawh ruihhlo thatlohzia hi inhrilhhriat nasat a tul hle thu an sawi a ni.
Meeting-ah hian Home, H&FW, Social Welfare, Agriculture, Excise & Narcotics, School Education EF& CC Secretary-te leh an aiawh te, NCB leh Enforcement Directorate senior official te an tel.
