Chief Minister hovin Green Mizoram Day 2022 hman a ni

Aizawl June 10 : EF&CC Department buatsaihin vawiin khan Green Mizoram Day, 2022 chu Chief Minister hovin MINECO, Aizawlah thing phun a ni a. Kumin Green Mizoram Day thupui hi “Thing phun la, Tui hna siam rawh” tih a ni. MYC Hall-ah inkhawm buatsaih niin, kangmei veng kawnga inelna State Level Fire Prevention Award a district titha ber pathumte hnenah leh district level lawmman sem a ni bawk.
Chief Minister chuan he inkhawmah hian thu sawiin, Mizoram ti hring tha leh tur leh, thing leh mau humhalh zelna kawngah tih tak takna nen thawh a pawimawh thu sawiin, kan thing phun te hi a hming chauh a phun mai lovin, a nung zui ngei tur thing tiak thlan uluk a tul thu te, hnim in a dip ral mai loh nan a hungna uluk a, thlithlai zui a pawimawh thu te a sawi. Chief Minister chuan tunlai khawvelah, a bik takin ram hmasawnna kawnga hnufual zawk ah environment humhalhna leh economy tihhmasawnna chungchangah ruahmanna fel tak siam a pawimawh thin thu a sawi a. Kumin Green Mizoram thupui chu tha a tih thu a sawiin, tui hna tha tak kan neih te hi humhalh zui loh chuan la kang mai thei an nih avangin a tichhetu kan nih loh nan tanrual a pawimawh thu a sawi a. Kan ram hi a that lohna lai, duhthu samlohna lai sawi tur langsar tak tak a awm laiin, a tha lai leh a fakawm lai a awm teuh tih hre chungin, a thalo lai te mahni theihna zawn theuh a siamtha tura pen in, Zoram hmasawnna turin theihtawp chhuah tlang turin mipui a sawm a ni.
EF&CC Minister TJ Lalnuntluanga chuan Mizoram thing leh mau, nungcha humhalh a tihchangtlun kawngah mi thahnemngai tak tak an pung chho zel nia a hriat thu sawiin, khawvel sik leh sa danglam (climate change) avangin harsatna khawvel pumin a tawk tih a sawi a. Mizoramah ngei pawh tui hna a lo kang chhoh telh telh dan a sawiin, Kum hmasa lama ruah tui tlak har lai taka kangmei nasa taka a chhuah thu sawiin, kuminah chuan khatiang thil a thleng ta lo chu a lawmawm rualin, tiang chhiatna hi a thlen leh tawh loh nan mihring lamin kan tih theih chin, kan environment humhalh a, tui hna din thar chu kan tih ve makmawh a nih thu a sawi a. Forest department in hmachhawp a siam hrang hrangte a tarlang bawk a. Forest Minister chuan Green Mizoram day hi tangkai taka ngaihtuahna thar nen hmang turin a chah.
Thing phunna hmun hi MINECO site G-4 niin, tlaizawng leh herhse tiak phun a ni.
District Level Fire Prevention Award dawngtute chu:
1) Serchhip district
2) Champhai District
3) Aizawl district
Village Level Fire Prevention Award dawngtute:
1) Samlukhai
2) Khawpuar
3) Lungsum & Maubuang
Heng lawmman te hian citation leh pawisa fai (pakhatna cheng sing nga, pahnihna cheng sing thum leh pathumna cheng sing hnih) a keng tel a ni.
Kum 1999 atang khan Mizoramah hian Green Mizoram Day Programme hi hman tan a ni a. Kum 1999 atanga 2012 thleng khan State Level Committee in a rel angin June thla chhunga a rem dan anga hman thin a ni a, kum 2013 atang erawh chuan June ni 11 hi Green Mizoram Day a tan Committee in a fix ta a ni. Green Mizoram Day hi sorkar programme pakhat anih avangin state level ah chuan Aizawl ah hman thin a ni a, kum 1 erawh chu Thenzawl ah hman a ni thung. District tinah Deputy Commissioner kaihhruainain nimin khan an hmang ve bawk a; Forest Division hrang hrangah, Zirna Sikul leh Department hrang hrangten he ni-ah hian thingphun beihpui an thlak a ni. Hri leng avangin kum 2020 ah Green Mizoram Day hman a ni lo va. Kum 2021-ah erawh District hrang hrangah te Ceremonial Function neiin thingte phun leh a ni a, seedlings te sem chhuah a ni bawk, Mizoram pumah thingtiak 47,158 phun a ni a, 158,743 lai mai semchhuah bawk.