Aizawl 15.3.2022: Chief Minister Pu Zoramthanga hovin vawiin khan Mizoram State Disaster Management Authority (SDMA) chu Chief Minister Office Conference Hall-ah an thukhawm. Deputy Chief Minister Pu Tawnluia, Home Minister Pu Lalchamliana, P&E Minister Pu R. Lalzirliana, FCS&CA Minister Pu K. Lalrinliana leh member dangte an tel a ni.
Vawiin meeting-ah hian kum kalta chhunga SDMA hmalakna hrang hrang report ngaihthlak hmasak niin, relki hrang hrang chhawpchhuahte ngaihtuah zui nghal a ni a. COVID-19 laka him theihna tura inkaihhruaina SOP hman mek hnuaia inkhuahkhirhna thenkhat ennawn tura department leh pawl hrang hrang atanga rawtna thu lutte chu sawiho in, zirchianna siamte chu ngum taka ngaihtuah a ni a. Heng zingah hian zirna in hrang hranga zirtirna kalpui zui zel dan tur te, inkhawm chungchang leh state entry point a inkhuahkhirhna te a tel a ni.
Heng bakah hian State Disaster Mitigation Fund hmanga mitigation project kalpuite vil a enzui tur Appraisal Committee din tura rawtna te, Minimum Standard of Relief kaihhruaina draft guidelines an pharh te leh thu pawimawh dang ngaihtuah tura chhawpchhuah te chu a thuphunga pawm a ni.
Attachment
