Chief Minister Zoramthanga hovin vawiin khan CM office Conference Hall ah Mizoram chhunga National Highway a hnathawh mek dinhmun leh harsatna awmte sawihona neih a ni. Land Revenue & Settlement Minister Pu Lalruatkima, Adviser to CM Pu C. Lalramzauva, Adviser to CM (Techncial) K. Lalsawmvela pawh he meeting-ah hian an tel a ni.
Mizoram hmun hrang hranga NHIDCL hnathawh dinhmun leh harsatnate thlirho a ni a. Vairengte Sairang kawng (NH-306 & 6) te, Lunglei Tlabung (NH-302), Selina Dulte (NH-6), Chhatlang leh Serchhip bypass (NH-53) te Keifang Tuivai (NH-102B) leh Tuipang (NH-54) a forest clearance chungchang te, utility shifting chungchanga P&E Department nena an indawr mekna te enho a ni a. Heng harsatna hrang hrangte hi working season laia a tam thei ang ber thawh a nih theih nan a tul anga sawrkar laipuia hotute hnena thlen ngaite chu thlen ni se, an ti bawk. Heng bakah hian bypass road siam belh tur, sawrkar laipuia la nawr ngaite sawiho a ni bawk.
