Vawiin Dt 29.07.2024, Thawhṭanni hian MNF party chuan an office Mizo Hnam Runah chhung inkhawm an neih a. He hunah hian Pu C Lalramzauva PAC member, MNF Legal Board Chiarman ni bawk chuan thu a sawi a. “Mizoram tana pawimawh em em, the Mizoram (Protection of Rivers) Act 2023, sorkar hmasa hunlaia pass tawh chu ZPM sorkar hian Nodal Department tur pawh an la siam fel lo a. Chu dan pawimawh tak chu an la mut tir mai mai a ni,” a ti.
“Khawchin inthlak zelah kan luite enkawl a, vemhim a, humhalh a ṭul tehlul nen lui 16 zet enkawlna tura sorkar hmasain dan a lo siam tawh chu ngaihthah a ni mek a. An la then vel mai mai hi a pawi tak zet a ni,” a ti a. Pu C Lalramzauva chuan, “A dan hi ṭha tawk lo awma an hria a nih chuan siam ṭha se, hetiang dan pawimawh lutuk mut tir mai mai hi a dik lo a. Inneihna vela kal leh khuallian vela ṭanah an la lungawi tawk niin a lang,” a ti bawk.
Senior Advocate Pu C Lalramzauva chuan, “Mipuite tana dan hlui tawh ZNP an nih hunlaia kan CM ni ta Pu Lalduhoma pawhin tih tawp ṭha a tih, a CM hnu pawha tih tawp ṭha a la tih zui zel Riverine Reserved Forest, 1965 chu tunhnaiah tinung tura hmalak leh a ni a. ZNP an nih lai khan Assembly House-a a member pui Pu K Liantlinga chu Mizoram Assembly paruknaah Resolution putluh tirin, Riverine Reserved Forest Area țhiata tlang sang lama sawn rawtna a thlen tir a, hei hi House pawhin lungrual takin a lo pass tawh a. Hemi hnu 19th Nov. 2019 maiah pawh khan House-a Official Resolution pakhat sawihonaah tlang sang lama Reserved Forest sawn a țul thu leh luipui kam ram țhalaite hman țangkai theiha siam a țul thu a sawi leh bawk.
“Hetihlai hian tunah chuan a dinna thlak leh thutin, Riverine Reserved Forest tih nun leh tumna chu Pu Lalduhoma kaihhruai sorkar hnuaiah Mizoram sorkar Advocate General chuan a lo thlawp leh ta daih si hi a mak hle. Kan CM hian eng rilru nge a put tih hi ka zawhna a ni,” a ti.
MNF PAC member chuan, “Kha leh chen thil ṭha a lo sawi tawh a, thil ṭha tinreng ti turin an intiam a. Pu Duhoma sorkar-in min hruai dan tur hi a lang ruak tawh a, a ropui lem lo viau dawnin a lang. An sawi loh dan ang hlirin an awm chho ta a ni ber awm e. Ṭawngkam thiamna leh dengkhawng tak taka min beih a, ram ṭha lo lehzuala min hruai luh an tum ni berin a lang,” a ti.
Pu C. Zama, President, Ex-MNA chuan kum 40 kal ta a MNA pathum Churachanpur Branch State Bank rawka puh mi pathum Sgt. Lalzarliana s/o. Lalhmingthanga, Thenzawl Pte. Biakhluna s/o. T. Lalhnema, Kolasib
Pte. Vanlalhruaia s/o. L.K. Siama, Thingkangphai, Churachanpur
te case chu theihtawpa umzui a nih hnuah, ni 23 July 2024-a tihtawp a nih tak thu report ngaih thlak a ni bawk.
He hun hi Pu J Lalremruata Hmar, General Secretary-in a kaihruai a, Pu Malsawmpuia Ralte, Secretary-in hunserh a hmang a ni.
