Ni hnih chhung awh tur (Nov 14-15 2022) Kisan Mela, ICAR Research Complex for NEH Region Mizoram Centre in Kolasibah a buatsaih chu vawiin khan Chief Minister Zoramthanga chuan khuallian niin a hawng a. ICAR hmunah Type-II quarter pahnih sakna tur lungphum phumin, thing a phun bawk.
Chief Minister chuan ICAR in publication hrang hrang, loneitute leh zirchiang mite tana tangkai tur an siam chu a tlangzarh bawk. Chief Minister chuan lei nghenga eizawnna hmanga Mizoram chu intodelh turin ram mipui chawm zo khawp ram ruak hman tangkai theih a awm thu te, sik leh sa nuam, ruahtui tha tak, boruak thianghlim te a awm thu a sawi a. A hlawk zawk a tharchhuah zawk theih nan kalphung thlak ngai enge kan neih tih te, harsatna kan neihte sutkian a nih theih nan te mithiam researcher te nen thawhhona tha loneitute chuan an neih pawimawh a ti a. Sawrkar chuan theihtawpin puiin, mimal a tih theih lo lai – link road leh tul dang dangte siam a tul thu te a sawi.
Chief Minister chuan theihna (potential) kan neih hi ngaihtuahna thlak danglamin, kaldan phung pangngai a hlawk lo a nih chuan a hlawk zawk te zawngin, tunlai thiamna hman tangkai nachang hriain, tangrual takin kan ram hian hma sawn theih nan hma kan lak tlan a ngaih thu a sawi.
Loneitu thlan bik thenkhat hnenah puihna khawl leh bungraw dangte ICAR scheme kalpui mek Tribal Sub plan scheme hnuai atanga pek chu Chief Minister hian a hlan bawk a ni.
Khualzahawm Food, Civil Supplies & Consumer Affairs Minister K. Lalrinliana chuan thu sawi bawkin, tun hma atanga vawiin thlenga ICAR hmalakna leh loneitute tana hlawhtlinna hrang hrang an lo thlen tawh thin chu lawmawm a ti a. Kuthnathawktute’n hma an lo sawn a, an sum lakluh a lo pun zawk a, hlawk zawk leh kalphung tha zawkte hrilh a kaihruai tura ICAR chu din a nih angin kuthnathawktute pawhin hman tangkai nachang hria a, thawhhona tha nei zel tura a duhsak thu a sawi a. Loneitute tana mela buatsaih chu hlawkthlak taka hman a nih a, rah tha a chhuah ngei a beisei thu a sawi.
Kisan Mela ah hian stall 21 awmin, sawrkar department bakah Thingdawl Farmers society, Kawnpui Women farmer club, Bilkhawthlir SHG, MzSRLM Thingdawl RD SHG ten an thil siamchhuah leh tharchhuah te an pholang a ni.
Mela hi Kolasib district hrang hrang a tangin loneitu 400 dawn te chuan an chhim a. Hawnna programme a zawh hnu hian ICAR leh Agri & allied sawrkar hotu hrang te’n Interface an neih chhunzawm nghal a ni. He meeting hi Dr. V.K. Mishra, Director, ICAR RC NEH Region, Umiam, Meghalaya chuan a kaihruai a, James Lalluaia, Addl. Director, Dept. of Agriculture, Govt. of Mizoram chuan a ho bawk a ni.
