Dated Aizawl, the 22nd May, 2024: Chief Minister Pu Lalduhoma chuan vawiin khan a office-ah Mizoram Environment & Forest Consultative Forum (MEFCOF) hruaitute a kawm.
Chief Minister hian, mahni sum leh pai senga ramngaw humhalh leh tuihna tihpunna lam buaipuitu MEFCOF chu pawl zahawm tak nia a hriat thu a lo hrilh a. An ruahmanna te a hlawhtlin theih nan sawrkar pawhin thawhpui zel a tum dawn tih lo hrilhin, an ruahmanna te chu ziaka thlen turin a chah a ni.
MEFCOF hian an bul tan nan kum 2004 khan Neihdawnah Zo Thei Huan an siam a, a hnuah Chawngtlaiah an din leh a, khaw hrang hrangah kalin ramngaw humhalh tulna an zirtir zel a. Zo Thei Huan Committee din zelin chung pawl te chuan an khaw Zo Thei Huan chu an enkawl zel a, tunah hian khaw 174 ah Zo Thei Huan hi an din tawh a ni. An thupui ber chu “khawih loh” tih a ni a. Khawtinah humhalh theih ngaw awm te tha taka humhalh a, nungchate pawh zalen taka awmtir chu an tum ber a ni. Tin, tuihna kam zel a lo pun thar theih nana Rain Garden Policy an duan chu Chief Minister hmaah sawifiahin; Tlawng lui tuihna tipung tura pilot project kalpui an duh thu an thlen nghal a ni. An pawl hruaitu Pu VL Bela hian kum 1975 atang khan Tlawng lui hi a hun leh hmun ngaiah kumtin tui san zawng a la teh ziah thin.
