Chief Minister-in Tualte Tomato Festival a khar

Tualte Tomato Growers’ Co-operative Society Ltd. leh Horticulture Department tangkawpin a buatsaih Tualte Tomato Festival chu vawiin khan khar a ni a. October ni 25, 2022 a Tualte khua ah he festival hawnna hi neih a ni a. Vawiin khan Aijal Club-ah khuallian Chief Minister Zoramthanga hovin a kharna inkhawm hi hman a ni. He hunah hian Dy. Chief Minister Tawnluia chu khualzahawm niin Horticulture Development Board Vice-Chairman Prof. F. Lalnunmawia chu Special guest a ni.
Chief Minister Zoramthanga chuan thu sawiin, Tualte Tomato Growers Co-operative Society Ltd. in hlawhtling taka tomato an tharchhuak chu lawmawm a ti a. Cooperative Society a indin a, an tumruhna rah tha hmuh tur a awm chu fakawm tiin, cooperative society pawimawhna an pholang tha hle nia a hriat thu a sawi a. Kuthnathawktute atanga bultan in, society ah insiam a hmalakna hi hmasawnna atan a pawimawh thu leh a ngelnghat zawk thu a sawi a. A tul apiangah sawrkar chuan ruahmanna siam sakin a puih zel tur thu a sawi a. Mizoram hmun dang dangah pawh hetianga hmalakna hi hmuh belh zel theih ni se, a ti.
Chief Minister chuan leilung nghenga eizawnna hmanga state economy hausakna tur tham potential Mizoramin a neih thu a sawi a. Chumi atan chuan tam tham tak a tharchhuah te, a remchanna apiang khawl han te a nih thu a sawi a. Thlasik thlai thar theih nan a ruahtui khawl pawimawh thu te an sawi bawk. Tualte khua in an tomato tharchhuah atanga hlawkna an hmu chu lawmpuiawm tiin, a let tam taka hlawkna an hmuh zel a duhsak thu a sawi.
Khualzahawm Dy. Chief Minister chuan kuthnathawktute intodelh kawnga hmalakpui hi sorkar in a tum pawimawh ber zing a mi a nih thu a sawi a. Tualte khua chu midang enthlak an nih thu leh midang tan entawntlak ni ngei turin a chah a. Thei leh thlai a eizawnna a hlawhtling tur chuan hlawk tham a tam tharchhuah a pawimawh thu a sawi a. Buaipui tham tharchhuah chuan a hralhna tur chu kawng a inhawn zel tur thu a sawi a ni.
Kum 2018 khan Tualte khuaah KVK, Khawzawl-in a chin hun pangngai kher lovah pawh (off-season) tomato variety thlan bikte hmangin tomato a chin theih a ni tih enchhina (trial) hlawhtling tak an neih hnu kum 2019 atangin Horticulture Department chuan mi tam zawkin an chin theih nan hma a la chho ta a. Kum 2022 a her chhuah meuh chuan tomato chingtu chhungkua 223 an lo awm ta a ni. Tualte Tomato Growers Co-operative Society Ltd. tih hming puin Society ngelnghet tak an ni chho mek a ni. Kum 2019 atanga vawiin thlenga tomato hralhna atanga Tualte khua sum lakluh tawh zawng zawng hi cheng nuai 600 chuang a ni a, Mizoram hmun hrang hrang bakah Silchar leh Tripura-ah te tomato thar lam tha tak tak an thawn thin a. Mizoram atanga State pawn lama tomato thawn chhuak hmasa ber khua an ni. Bialtu MLA Tawnluia hmalak puinain Tomato sauce/ketchup te siam tel zelin, mipuite lei theih turin tunhnai mai khan chhawp chhuah a ni.