Vawiin khan Chief Minister Pu Zoramthanga chuan Rajiv Gandhi Stadium, Mualpuiah XXI Mizoram Police Sports Meet, 2023 chu khuallian niin a hawng.
Parade Contingent 14 ten chibai an bukna a chhan zawhah thusawiin Chief Minister chuan, Mizoram Police Sports Meet chu Police te tana taksa leh rilru intuaihriamna hun pawimawh a ni a. Police te chu rilru leh taksa hrisel nei reng tura ngaih an ni a, taksa leh rilru a hrisel that loh chuan kan hnathawhna lama a tibahlah thin. Tunlaiah ruihtheihthilin kan thalaite a tibuai nasain, kan Police thenkhatte ngei pawh a tihbuai zingah an tel hial ang. Heng thil thalo lakah hian hnehtu nih tum tlat turin ka ngen che u a ni. Tun hnaia buaina leh harsatna chi hrang hrang lo awm thin lakah Police ten chhuanawm takin hna in thawk a, ralthuam tawlh rukna te, Drugs tawlh rukna te leh smuggling chi hrang hrangin min chim a, heng thil tha lo che vel te laka huaisen taka in hmalakna hi kan chhuang hle a ni. In ngaihtuahna te fim taka hmangin huaisen a hunah huaisen takin, dawhtheih a hunah dawhthei takin, zaidam a hunah zaidam takin; ram dang mite tana entawn tlak Police tha ni zel turin ka ngen che u a ni. Kan thenawm ramteah buaina a awm avangin mi tam tak an rawn raltlan tih kan hria a, ram ralmuang tak kan nih hlutzia hi hrerengin Mizoram hi remna leh muanna entirtu ram, state entawn tlaka awmtir zel turin i thawk ang u, tiin a sawm a. Sports hlimawm leh hlawk tak an buatsaih theih nan duhsakna hlanin a hawng a ni.
Pu Anil Shukla, IPS, DGP, Mizoram pawhin thusawiin, Chief Ministerin XXI Mizoram Police Sports Meet a hawn sak avangin lawmthu a sawi a. Mizoram police ten sports huangah India ram huapin hlawhtlinna an lo chang fo tawh tih tarlangin tun hnaia India ram state police zawng zawng inelna 71st. BN Mullick Memorial Football Championship, Srinagar, J&K a buatsaihah pawh Mizoram Police chu an champion a ni, a ti. Police ten tha taka an hna an thawh theih nan rilru leh taksa hrisel an neih a tul avangin Sports hi Police te thuamthatna pawimawh tak pakhat a nih thu a tarlang bawk.
XXI Mizoram Police Sports Meet, 2023 ah hian Police te chu contingent 12 ah inthen darhin discipline 18 ah inelna an nei dawn a, police infiammi 1107 an ten intihsiakna an nei dawn a ni. Tun thla ni 22 thleng a awh ang.
Mizoram Police Sports Meet hi kum 1987 atang khan rokhawlhna a awm loh chuan kum tin buatsaih thin a ni a, kumin hi a tum 21 a ni.
