Vawiin February 23, 2023 (Ningani) chhun dar 12:00 – a PC Party OB meeting ṭhutkhawmna kaihruaitu Vanlalruata President chuan,”Chief Minister Office (CMO) inrelbawlna hautak lutuk vei awm a tih thu a sawi.
Vanlalruata chuan, Minister dang 11 enkawlna aiin Chief Minister enkawlna hi a hautak zawk tih sawiin, “Council of Ministers Budget hi a pumpuiin Budget tharah hian cheng nuai 713.18 a ni a; Hemi atan hian 2021-22 khan cheng nuai 603.91 hman a ni. Kum kal lai 2022-23 budget-ah hian cheng nuai 702.34 ruahman anih laiin cheng nuai 754.04 hman tur anga pawisa dil belh a ni a; Kum hmasa aia cheng nuai 150.13 laia tam hman a ni tur anga lang hian rilruah zawhna a siam tam ngei mai a. Kum kallai a sum hman aia tlem budget thara ruahman a ni leh lawi hian hmasawn tumna felfai awm loh zia a tarlang.” a ti
Vanlalruata chuan, ”He council of Minister budget-a 55.14%, cheng nuai 393.25 hi Minister 11 enkawlna tur a ni a. A bâk 44.85%, cheng nuai 319.93 hi Chief Minister enkawlna tur a ni thung a. Hetianga CM enkawlna hautak em em chhan hi CMO (Chief Minister’s Office) tia kan sawi thin, Chief Minister’s Secretariat hranpa, ropui tak mai Zarkawt-a kan neih vang a ni a. Hemi enkawlnan hian 2021-22 khan cheng nuai 255.94 hman a ni a. Kum kallai 2022-23 hian a tirah cheng nuai 250.23 hman tura chhut niin cheng nuai 273.23 hman leh zawk tura ruahman nawn a ni a. Budget tharah hian cheng nuai 274.39 hman tura ruahman a ni. (Heta senso leh senso tura ruahman tarlanah hian venhimna lam senso leh a bungalow enkawlna senso a la tel lo a ni). Chuvangin CMO
hranpa nei lo ta ila thil dang tulah kan hlawkpui viau dawn a ni,” a ti bawk,
