“April thla a tawp dawn thleng pawha Mizoram sorkar hnathawk tam takin March thla hlawh an la thei lo hi Congress Party chuan mak a ti a, Finance enkawltu Chief Minister Pu Zoramthanga hlawhchham zia a tarlang chiang hleah kan ngai,” tiin vawiin khan MPCC chuan thuchhuah a siam.
Thuchhuahah chuan, “Vanglaini chanchinbu a Finance Department insawifiahna ‘IFMIS hman thiam loh vang a ni’ tih hi Department hrang hranga hlawh siamtute kan kawmnaah a dik tawk lo tih a lang a. India rama sorkar sum enkawl dan thar, Integrated Financial Management and Information System (IFMIS) hian harsatna tam tak a thlen ngei a. Amaherawhchu, he harsatna hi Department hrang hrangte thiam loh ni lovin, IFMIS system-ah fel lo tam tak a awm vang zawk a ni a. Kum 2 kalta atanga he system hi hman tura tih a nih rualin, vawiin thlengin system-ah fel lo a tam a, portal a luh theih loh te, approve theih mai loh te, luh hleih theih loh changte, bawhzui fe pawha approve mai theih lohte a tam em em a. Hei hi Sorkar thiam loh dik tak a ni a, a bikin Finance Minister Pu Zoramthanga’n mawh a phur lian ber a ni.
“Congress hunlai khan sorkar hnathawk nghette hlawh lak theih loh a awm ngai lo a, sorkar hnathawkten Congress sorkar hnuaiah a hun taka hlawh an lak mai bakah GP Fund leh Bill hrang hrang hun rei tak tih khawtlai a awm ve ngai lo. MNF sorkar hnuaia hetiang taka Finance management a buaina a thleng chho ta hi MNF sorkar leh Finance Minister, CM ni bawk Pu Zoramthanga hlawhchham zia a tarlang chiang hle a ni.
“Congress Party chuan Mizorama sorkar hnathawk zawng zawngte ram sum leh pai enkawlna kawngah thil kal tawh thlir let a, thil nihna dik tak hre tura ngaihtuahna tak tak seng turin kan duh a. A sawi thiam apiangte sawi awih ringawt lovin, an dang nala tlu ringawt lo a thil tak tak ngaihtuah turin kan duh a ni. Congress Ministry liam ta kha duhthusam ni lo mah se, tuna MNF sorkar hnuaia Mizoram sorkar hnathawkten harsatna an tawh thin tam tak ang hi Congress sorkar hnuaiah khan an tawk ngai lo tih hre nawn leh turin kan ngen a ni,” tiin an tarlang bawk.
