Chief Minister Zoramthanga, Special Economic Development Policy (SEDP) Governing Board Chairman ni bawk chuan vawiin khan Vanapa Hall-ah Mizoram Sawrkar Flagship Programme – Socio Economic Development Policy hnuaia mimal chhungkua hmasawnna leh an eizawnna tinzawn a eizawnna ngelghet an neihna tur, Family Oriented SEDP hawnna programme khuallian niin a hmanpui.
Chief Minister Zoramthanga chuan hripuiin Mizoram tiamin khawvel pum kum hnih chhung a tihbuai leh a tuam avangin SEDP pawh hi a pangngai anga kal chhohpui a harsa chungin Sawrkar chuan SEDP hi kan sum dinhmun ngaihtuah chungin a theih ang angin kan tling chin angin kalpui kan rel tiin a sawi a. Sum leh pai dinhmunin a zir loh avangin a tira SEDP duan angin leh duhthusam anga kalpui chu a theih dawn lova amaherawhchu engemaw zat chu Sawrkarin a tih thei dawn a. Chumi bultan nan Mizoram pumah tun Sawrkar kum chungin chhungkaw 60,000 chu a target a, cheng 50,000 theuh pek a ni dawn a, hei hi a kumkhatna atana kan bultanna a nih tih hi kan hriat a ngai a. Hei hi a tawpna a ni lova, SEDP in a target kha chu chhungkaw tin tan nuai 3 a la ni a, ala kal zel dawn a ni, a ti. Sawrkar sum dinhmun a that leh zual hunah SEDP in chhungkaw tin tana target chu tihhlawhtlin ngei a beisei thu a sawi. Politics ah chuan inbeihna te, insawiselna te chu a awm lo thei lova tiin heng insawiselna te hi democracy tithianghlimtu a ni, a ti. Covid hripui avangin Sawrkarin sum a dawn tur a dawn tak loh, a hloh chu cheng vaibelchhe 3000 vel a nih thu tarlangin Sawrkarin kum 2022-2023 chhungin Family Oriented SEDP atana vaibelchhe 300 dah anih thu a sawi bawk.
Chief Minister hian a Ist Instalment atana beneficiary tin te pek tur sum chu a hlawmin Line Department 9 te hnenah a cheque in a hlan a. Agriculture Department chu cheng 23,36,05,500 cheque hlan niin Department hnuaia beneficiary 9161 an awm dawn a; Animal Husbandry & Veterinary Department chu cheng 64,76,74,500 cheque hlan niin Department hnuaia beneficiary 25,399 an awm dawn a ; Commerce & Industries Department chu cheng 33,82,83,000 cheque hlan niin Department hnuaia beneficiary 13,266 an awm dawn a; Fisheries Department chu cheng 3,21,55,500 cheque hlan niin cheque hlan niin Department hnuaia beneficiary 1261 an awm dawn a; Horticulture Department chu cheng 10,39,89,000 cheque hlan niin Department hnuaia beneficiary 4078 an awm dawn a; Land Resources, Soil & Water Conservation Department chu cheng 14,48,40,000 cheque hlan niin Department hnuaia beneficiary 5680 an awm dawn a; Sericulture Department chu cheng 76,50,000 cheque hlan niin Department hnuaia beneficiary 300 an awm dawn a; Tourism Department chu cheng 6,63,000 cheque hlan niin Department hnuaia beneficiary 26 an awm dawn a leh Urban Development & Poverty Alleviation Department chu cheng 2,11,14,000 cheque cheque hlan niin Department hnuaia beneficiary 828 an awm dawn a ni.
Programme kaihruaitu Deputy Chief Minister Tawnluia, Vice Chairman SEDP Governing Board Vice Chairman ni bawk chuan SEDP duanchhuah dan te, SEDP thil tum te, SEDP kalpui nana ruahmanna hrang hrang siamte, an kenkawh dan tur te chu chipchhiar takin a sawi a. SEDP chu Mizoram chakna leh theihna te zirchianga, mipui ngaihtuah leh sutthlek te milh a duan a nih thusawiin Mizoram intodelhna leh hmasawnna tura atan rahbi pawimawh tak a nih thu a sawilang bawk. Deputy Chief Minister hian District 11 a SEDP kalpuina tana DC tin atana SEDP sum ruahman chu cheque in a hlan a ni.
Family Oriented Socio-economic Development Policy (SEDP) in a tum bulpui ber chu mahnia eizawnna (self employment leh kut hnathawh) bultan na atan leh chutiang eizawnna kalpui mekten hma an sawn zel nana an hman tur tanpuina pek leh Mizoram chhunga mimal leh chhungkua, a tam thei ang ber, dimhmun tha zawka hlankai a ni.
‘Family Oriented’ a nih angin tanpuina hi chhungkua anga dawn tur a ni a, chhungkaw pakhat atangin beneficiary pakhat chauh pek a ni dawn a. Agriculture, Horticulture, Animal Husbandry & Veterinary, Fisheries, Sericulture, Land Resources, Soil & Water Conservation, Commerce & Industries, Urban Development & Poverty Alleviation leh Tourism Department te hnuaiah hian trade items 70 chuang (eizawnna kalpui tur) thlan a ni.
Family Oriented thawh khatna (Phase-1) ah hian chhungkaw 60,000 huam turin MLA Constituency tinah chhungkaw 1500 theuh thlan an ni a, tanpuina hi a chunga tarlan Department te kaltlang hian thawh hnih in sem chhuah tur a ni a. Hemi ni hian a thawh khatna atana Department ten an sem chhuah turin cheque vawiin khan hlan an ni.
