Chief Minister Zoramthanga’n Tlangsam Winery a tlawh

Aizawl, the 25th Oct. 2022 : Chief Minister Zoramthanga chuan vawiin khan Tlangsam Champhai Grape Growers Society te grep sawngbawlna hmun Winery chu tlawhin an hmalaknate a enfiah.
Chief Minister chuan Champhai Grape Growers Society hruaitu leh member te nen inkawmna hun hmangin, an hmunhma tihchangtlun dan chu fakawm tiin, an hmalakna ah hlawhtlinna nasa zawk an chan zel a duhsak thu a sawi a. Grep chin a eizawngtute hamthatna tura Wine Rules siam a nih chhoh dante sawiin, hmazawn belh zelna tur hmathlir tha neih pawimawh a tih thu a sawi a. Chief Minister chuan grep quality tha nei a vawng reng tura hmalak te, mithiamte nen thawkho a a chin leh enkawl dana hmalak belh pawimawhna te sawiin, grep tui sawr a sawngbawl na tur hmanrua tihchangtlun belh nen project tha dang duanchhuah pawimawhna te a sawi pui. CM Zoramthanga chuan Champhai chu boruakin a zir avangin grep bakah thei leh thlai chi hrang hrang tha taka tharchhuah theih a nih dan te, chutiang bawka Mizoram hmun hrang hrang chu buh bakah thei, thlai leh pangpar chi hrang hrang tharchhuah theihna tur hmun, ruahtui leh sik leh sa tha tak neia malsawmna chang a nih thu a sawi a. Hausakna thlen thei khawp a malsawmna kan dawn te hi en liam mai lova, chu hausak a chu taimakna leh remhriatna nen haichhuah ngei tum tur kan nih thu a sawi.
Inkawmhona hun Packing Hall, Champhai Winery, Tlangsama hman hi HS.Vanlalfakzuala, Chairman, Champhai Grape Growers Society (CGGS) chuan a kaihruai a. Hrilchunglura, General Manager hnen atangin report ngaihthlak a ni. CGGS enkawl Champhai Winery hian kum 13 hmel a hmu tawh a, an Grape sawngbawl hi Bangalore Blue variety niin, vawiin thlengin Grape quintal 15,218 an lei tling tawh a, hemi atan hian Rs. 5,78,41,160/- (cheng vaibelchhe nga maktaduai sarih nuai riat singli sangkhat za leh sawmruk) an seng tawh a ni. Kum 2010 atang khan Grape quintal 918 leiin bul an tan a, kumin hian quintal 1144.98 an lei tling a, an Grape lakte hi herin a umna zemah an dah fel tawh bawk.
Kum 2007 khan Champhai Grape Growers Association (CGGA) tih thin chu Winery din a nih dawn avangin Champhai Grape Growers Society (CGGS) ti a thlak niin, Firms & Society-ah an inziahlut a ni. Khatih hun laia Agriculture Minister H.Rammawi, State Planning Board Vice Chairman ni mek hmalaknain MIP sum cheng nuai 83 (loan) hmanga bultan niin, he loan hi November ni 9, 2020 khan Sawrkar chuan rulh let ngai lo turin grant-ah a leh sak a ni. Champhai Grape Growers Society-ah hian Governing Board Member 15 awmin kum 2 danah inthlan thin a ni a. Tun dinhmunah hian Champhai Grape Growers Society-ah hian Grape chingtu member 135 awm mekin, Staff leh Worker mi 30, Office Bearer 6 an awm mek bawk a. Champhai Grape Growers Society hnuaiah hian Branch 9 awm mekin mumal taka inenkawlna kalpui thin a ni.
Champhai Grape Growers Society (CGGS) chuan The Mizoram Liquor Prohibition Rules, 2022 hnuaia Grape Wine dan thar, The Mizoram Grape Wine Rules, 2022 siam anih tak avangin Chief Minister hnenah lawmthu an sawi a. Heng bakah hian hrileng lai leh dan ang taka Grape wine hralh phalna siam anih hmaa an harsatna tawhte an thlen a. Grape chauh nilo, kan ram thlai thar Lakhuihthei, Theite, Dragon Fruit leh thei dangte thleng pawha sawngbawl anih theih nan dante uluk zawk leh zau zawka mipuite chhawr tangkai theih tura hma lak sak turin an ngen nghal bawk a ni.
CGGS hian Ministry of Food Processing Industries (MOFPI) kaltlangin project an kalpui mek a. Pradhan Mantri Jan Vikas Karyakram (PMJVK) hnuaiah Commerce & Industries Department kaltlangin project dil mek a ni bawk a. Heng bakah hian Ministry of Agriculture and Farmers Welfare hnuaiah MIS dil mek a ni a, an thil siamte State pawn thlenga hralhchhuak thei turin hmachhawp an nei a. Dan thar hnuaiah Winery License tinung thar leh turin hma an la mek a, rate mumal siama vendor-te thlan fel an nih hnuah dan anga Grape wine zawrchhuah tum a ni.