Mizoram Chief Secretary, Renu Sharma, chuan vawiin khan Mizoram State chhunga State Level Co-Ordination Committee (SLCC) on regulation of NBFC and UIBs meeting a kaihruai. Meeting ah hian Devesh Chandra Srivastava DGP, Mizoram Police leh Finance, Co-operative Societies leh Police Department atanga senior officials te leh RBI leh SEBI aiawh te an tel a ni.
Chief Secretary chuan, SLCC forum chu a pawimawhzia sawiin, NBFC leh Mizorama dan phal loha Bank anga indin te khuahkhirh nan a tangkai hle a ni, a ti a. Digital platforms leh online payment chungchang te sawiin, heng te hi inbumnan mi thenkhatin an hman sual thin avangin felfai taka khuahkhirh a tulzia a sawi. RBI in digital lending chungchanga guidelines an tichhuak chu tha a tih thu sawiin MPID Act leh BUDS Act 2019 te pawh hman thuai a nih theih nan hma la turin kalkhawmte chu a hrilh a ni.
DGP Devesh Chandra Srivastava pawhin BUDS Act 2019 chu hman thuai a tul thu sawiin, mipui te hrilhhriat lama hmasawn zel nan tunlaiah thu pawimawh thehdarh nan social media te Police in tangkai taka an hman thu a sawi. DGP chuan Economic Offences Wing police station din thar chuan economic kaihhnawih thubuai te a bawhzui thin tur thu a sawi bawk a ni.
Phungreikhai RBI GM&OIC Aizawl pawhin Digital Lending chungchanga RBI in guidelines a tihchhuah chu sawifiahin mipui te tana tangkai tak a nih tur thu leh online payment lama RBI in vision a neih dang te a sawi bawk.
Meeting ah hian agenda pawimawh tak tak te sawiho niin June 6,2022 a meeting vawi 12-na neih tak te review na pawh neih a ni. Police department lamin SP CID enkawlna hnuaiah Crime and Economic Offences Police Station chu ni 4 November 2022 ah hawn a nih thu an sawi bawk. Ashish Rai, Manager RBI chuan state dang atanga online hmanga inbumna awm thin te leh fimkhur a ngaihna lai te a sawi bawk a ni.
Meeting hi Haokholal, AGM, Aizawl chuan meeting pawimawh hi a khat tawka neih reng a pawimawh thu sawiin kharna hun a hmang a ni.
