NGO Co-Ordination Committee (Central YMA, MUP, MHIP, MZP, MSU) chuan naktuk May ni 31, 2022 atangin Chief Secretary Pisa kal tur chu dan an tum. Vawiin chawhma dar 11:00 khan NGO Co-Ordination Committee chuan AIzawl Press Club-ah chanchinthar lakhawmtute kawmin, an chairman R.Lalngheta Central YMA President chuan NGO Co-Ordination Committee chu Mizoram, Hnam, Sakhua a him theihna tura kawng hrang hranga hmala thin tu an nih thu sawiin, an hmalaknaa anmahni duhthu ngeia Tripura a tlan thla Tuikuk awm mekte Mizoram Electoral Rolls atanga paih an nih theih nante, ramri dik leh felfai kan neih theih nante theih tawpa hma an lak thin thu a sawi. NGO Co-Ordination Committee chuan, “Mizoram Chief Secretary dinhmun luah tura Mizote tling kan awm reng lai leh NGO Co-Ordination Committee ten sorkar laipuia kan ngenna ngaihpawimawh a ni lo hi hnam tlem zawkte dinhmun hriatthiam pui lohnaah kan ngai a. Chief Secretary-a Mizo ngei an awm theih nan Vice President, Prime Minister, Mizoram Governor, Union Home Ministry Ministry of Home Affairs te hnenah ngenna tum engemaw zat thehluh a ni a. Heng kan ngenna te hian ngaih pawimawh a hlawh lo a. Chief Secretary ni mek hi a mimal taka dona NGO Co-Ordination Committee chuan a nei lo a. Hetih mek lai hian he dinhmun chelh thei tur Mizo IAS an awm reng lai leh sorkar leh mipui aw ngaithla duh lova sorkar laipui hmalakna hi zawm har kan ti a ni.
“Mizo chauh Chief Secretary-a awm tur hian beisei theih a nih loh NGO Co-Ordination Committee hiana hmuh pui a, tling leh thei an awm chhung chuan ram leilung fate – Mizo duhsak hi kan phut a. All India Service Cadre hran Mizoramin a neih theih nan Vice President, Prime Minister, Union Home Minister te hnenah pawh ngenna thehluh tawh a ni,” tiin NGO Co-Ordination Committee chu Mizote tan, Mizo Hnam tan, Ram leh hnam tan a ding zel dawn tih an sawi bawk.
