Mizorama Chikungunya leng mek chuan zia-awm lam a pan lo mai ni lovin October thla chhung ringawt khan mi 40-in he natna hi an kai tih hmuhchhuah a ni.
Health department-a Jt. Director (Malaria) Dr. Hmingthanmawii sawi danin, Chikungunya natna vei tawh hi January ni 1 atanga November ni 6 thleng khan mi 53 an tling tawh a, an zinga 40 hi October thla a he hri kai ni an ni a. Nunna chan phah erawh an la awm lo. Chikungunya natna hi Lunglei district-ah a darh nasa ber a mi 47-in an vei tawh a. Lawngtlai district-ah mi 4 leh Aizawl district-ah mi 2 te’n an vei bawk.
Chikungunya hi hun engemaw chen atang khan Mizoramah a lo awm tawh a, kum 2020 phei kha chuan mi 67 in an vei a, kum 2018 khan mi 10-in an vei bawk. He natna hi Dengue ang bawkin thosi chi khat Aedes in a pu darh a, Chikungunya pudarhtu tak hi chu Aedes aegypti leh Aedes albopictus a ni a, hetiang thosi hi Mizoramah a tam avangin fimkhur turin health department chuan mitin a chah a ni.
Hetih lai hian Mizoram a Dengue hri leng mek chuan zual lam a pan zel a, mi 3-in nunna an chan phah tawh a, October thla chhung khan he hri kai hi mi 568 hmuhchhuah a ni.
Dr. Hmingthanmawii chuan, Dengue vang hian October thla khan mi 2 an thi a, November thla bulah mi 1 a thi leh a, Aizawl district ami vek an ni. Dengue hri hi kumin kum bul lam atanga leng tan a ni a, a tirah a nasa vak lo. August thla chhung khan he hri kai hi mi 84 hmuhchhuah a ni a, September thla-ah mi 159-in an kai a, October thla-ah chuan mi 568 an ni a. Kumin January atanga October ni 31 thleng khan Mizoramah Dengue hri kai mi 895 an tling tawh a ni. Dengue natna vei hi district dangah a awm ve na-in Aizawl leh Lunglei district-ah a hluar zual a ti.
Mizorama Dengue natna hmuhchhuah hmasak ber chu kum 2013 kha a ni a, mi 7-in an vei tih hmuhchhuah a nih thu State Vector Borne Diseases Control Programme (SVBDCP) hotute chuan an sawi a. Kumin hma lama dengue hri kai hmuhchhuah tam ber kum chu 2016 kum kha a ni a, mi 580 he natna hri kai hi hmuhchhuah a ni a. Kum 2017 khan mi 136-in an kai a, kum 2019 khan mi 131-in an kai bawk a ni.
State Vector Borne Diseases Control Programme (SVBDCP) hotute chuan Dengue natna hi those chi khat Aides-in a pu darh a, hetiang thosi hi Mizoramah a tam hle a. Sikserh natna thehdarhtu thosi ang lo takin chhunah mi a seh thin a ni.
