College of Veterinary Sciences & Animal Husbandary, Central Agricultural University te chuan World Egg Day 2022 chu Children Blessing School, Nausel, Sihphir te nen an hmang
Vawiin 14th October, 2022 khan College of Veterinary Sciences & Animal Husbandary (CVSc & AH), Central Agricultural University, Selesih te chuan World Egg Day 2022 Children Blessing School, Nausel khua a school naupang te nen an hmang ho. Kumin World Egg Day thupui chu “Eggs for a better life” tih a ni a, a awmzia chu “Hriselna leh chakna tha zawk neih theih nan artui ngei hi le”, tih a ni.
He World Egg Day hmanna ah hi Dr.Lalnuntluangi Hmar, Dean, College of Veterinary Sciences & Animal Husbandary (CVSc & AH), Central Agricultural University, Selesih chuan khuallian niin a hmanpui, school naupangte thahnem ngai tak leh taima taka lehkha zir turin a fuih. World Egg Day hmanna hi Dr. Lalhumliana Tochhawng, Assistant Professor in a kaihruaia. Dr. Saidur Rehman, Professor & Head, in lo kal khawmte lawmna thu a sawi a. Dr. Lallawmzuali Ralte, Assistant Professor chuan Children Blessing School, Nausel school naupang te hnenah Kumin World Egg Day thupui “Eggs for a better life” tih thupui hmangin Artui thatzia leh hrisel ziate, naupang leh tar chaklote, damsam lo leh taksa chaklote tana chaw tha em em a nih thu powerpoint presentation hmangin a sawi bawk. Dr. M.C. Lallianchhunga Assistant Professor chuan World Egg Day lawmna kharna lawmthu a sawi bawk.
College of Veterinary Sciences & Animal Husbandary te hian Children Blessing School, Nausel te hnenah hian Artui thatzia in zirtirna an neih bakah school tan hian White board 3, Plastic chair 6 leh school chalk leh duster te World Egg Day denchhen hian an hlan bawk a, tin, Artui chum hmin sa leh eitur dang tam tawk tak te nen Children Blessing School naupangte hi an hrai puar bawk a ni.
World Egg Day hi kumtin in October thla karhnihna Zirtawpni apiangin hman thin a ni a. Kum 1996 khan International Egg Commission (IEC) chuan Vienna a inkhawmpuilian (Conference) an neih tumin World Egg Day hi hman thin nise tiin a rel a, tichuan kumtin World Egg Day hi khawvel pum huapin hman a lo ni ta thin a ni. Tichuan, tun kum 2022 pawh hian he World Egg Day hi ni 14th October, 2022 (Zirtawpni) hian khawvel hmun hrang hrangah hman a ni bawk. World Egg Day hman chhan bulber chu mipui mimir ten khawvel pum huapin artui hi mihring tan chaw tha leh hrisel tak a ni tih an lo hriat zau zel theih nante, ei tur dang nen a khaikhin a chaw tha fuan khawm hnem bawk si, awlsam tak leh man tlawm taka lei theih mai a nih avang hian mi tam zawk ten chu chu kan lo hriat tlanglawn zel theih nan he World Egg Day hi hman thin a ni.
