Vawiin khan Aizawl Smart City Limited, Urban Development & Poverty Alleviation Department hmalaknain Civil Hospital, AIzawl-ah MRI khawl, mipuite tana tlangzarhna leh bungraw dangte hlanna hun hman a ni a. He hunah hian Pu K. Sapdanga, UD&PA Minister chu khuallian a ni a, khawl inhlanna hun hi Aizawl Civil Hospital Conference Hall-ah neih a ni. Pi Lalrinpuii, Hon’ble Minister, H&FW Department pawhin he hun hi hmanpuiin Pu Lalmalsawma Pachuau, Secretary, UD&PA Department chuan inkhawm hi a kaihruai a, khawlte hi Aizawl Smart City Limited, UD&PA hmalaknaa lei niin Pu K. Sapdanga, UD&PA Minister hian Aizawl Cilvil Hospital hnenah a hlan a ni.
Thu sawiin Khuallian chuanMizo Doctor thiam tak takte pawhin hmanrua kan neih that tawk loh avanga an thiamna leh theihna te a nih tur anga an hman chhuah theih loh fo thinnate pawhin ziaawm lam a pan chhoh zel a beisei thu a sawi a. Doctorte hlutzia leh an tawngkam khat lek pawhin damlote a thlamuan theihzia sawiin midangte thlamuantu ni fo turin a chah bawk a, MRI khawl leh khawl dangte pawh mipui rawngbawlna atan tangkai taka hmang zui zel turin duhsakna a hlan bawk a ni.
Khual zahawm Pi Lalrinpuii, H&FW Minister pawhin Aizawl Smart City hmalakna fakawm a tih thu sawiin, Mizoram sawrkar hmalak meknate a sawi a. PHC leh CHC thawm that a nih thu te, MUHCS hnuaia damlote tan ICU indaih lohna awm thin tihziaawm a nih theih nan, ZMC-ah ICU sawm pathum (13) siam belh a nih dawn thu te, Siaha, Lunglei leh Champhaiah pawh ICU panga (5) theuh siam a nih tur thute a sawi bawk a; hun rei loteah Kal thlak (Kidney Transplant) pawh kan tih ve thei tawh dawn thu a sawi bawk.
Pu C.C. Lalchhuangkima, Chief Executive Officer, Aizawl Smart City Limited in Report a pek danin, MRI khawl hi German Company, Siemens Healthineers kutchhuak niin nuai zariat sawmsarih leh pahnih (872) man a ni a; Siemens Company nen hian a chhiat pawha enkawl zui zelna turin thawhdunna thuthlung kum sawm (10) chhung atan an ziak bawk a ni. Smart City hmalakna hian MRI khawl bakah hian khawl dang chi hrang hrang sawmhnih pali (24), Aizawl Civil Hospital tan hian lei a ni bawk a ni. Dr. Lalchhuankimi, Senior Medical Superintendent hnen atangin heng khawl hnathawh dan leh tangkainate ngaihthlak a ni bawk a; khawl chi hrang hrang ziangah hian cancer leh natna chi hrang hrang awlsam zawka hmuhchhuah theihna te, zunthlum leh accident avanga mit del tur mai tur zai dam theihnate pawh a tel a ni.
Aizawl Smart City hmalakna hian tun hnaiah sawrkar leh private hospital hrang hrangte tan Ambulance pariat (8) lei a lo ni tawh bawk a; Tuirialah Common Bio-medical Waste Treatment plant cheng nuai 801.15 sengin din a lo ni tawh bawkin, April 2025 atang khan hman tan a ni tawh a ni.
