Congress Thalaite chuan thuchhuah siamin, “Mizoram Civil Pensioner Association chuan an pensioner puite harsatna sutkian nan Union Finance Minister hnenah Dt. 29th September, 2022 khan S.O.S. message lehkha hial an thawn tih Congress Thalai ten kan hriatin a pawi kan tiin zahthlak kan ti hle a ni,” an ti.
Thuchhuahah chuan, “Hetiang em em-a kan ram sum dinhmun a tlachhe ta mai leh chhungkaw sang tel ten tah leh hathialna hun an tawng mek hi pawi kan tiin, sawrkar kalphung tha lo lutuk hi kan dem takzet a. Congress Thalai chuan mipuite thlavang hauh nan hma kan la zel dawn a, pensioner ten an dikna leh chanvo dik tak an chan hma loh chuan theihtawp chhuahpui kan tum a ni. September 2022 thla thlenga Pensioner 1367 te an pension leh GPF etc a an lak tur hrensak mek chu cheng nuai 24,987 (Cheng nuai sing hnih sangli za kua sawmriat pasarih) lai a tling hi lungchhiatthlak kan ti em em a ni.
“Mizote hunpui Krismas 2022 kan lo thleng chho leh dawn hnai ta a, heng kan hunpui hi Pensioner ten hlim tak leh thlamuang taka an hman ve ngei theih nan an pension pawisa hi Krismas hma ngeia pe tur leh chinfelsak vek turin Congress Thalai chuan Mizoram Finance Minister, Chief Minister ni bawk hi kan phut takzet a ni,” an ti bawk.
Congress Thalaite chuan hemi chungchangah hian a hnuai a mi ang hian Chief Minister Zoramthanga hnenah lehkha an thehkut nghe nghe bawk a ni.
To,
The Chief Minister,
Govt. of Mizoram
Subject : Pensioner te harsatna chungchang
Ka Pu,
Congress Thalai Hqrs – Mizoram Pradesh Youth Congress Committee (MPYCC) hmingin chibai kan buk a che.
Mizoram Civil Pensioner Association chuan an pensioner puite harsatna sutkian nan Union Finance Minister hnenah Dt. 29th September, 2022 khan S.O.S. message lehkha hial an thawn tih Congress Thalai ten kan lo hria a, hei hi a pawi kan tiin zahthlak kan ti hle a ni.
Hetiang em em-a kan ram sum dinhmun a tlachhe ta mai leh chhungkaw sang tel ten tah leh hathialna hun an tawng mek hi pawi kan tiin, sawrkar kalphung tha lo lutuk hi kan dem takzet a. Congress Thalai chuan mipuite thlavang hauh nan hma kan la zel dawn a, pensioner ten an dikna leh chanvo dik tak an chan hma loh chuan theihtawp chhuahpui kan tum a ni tih kan hriattir che a. September 2022 thla thlenga Pensioner 1367 te an pension leh GPF etc a an lak tur hrensak mek hi cheng nuai 24,987 (Cheng nuai sing hnih sangli za kua sawmriat pasarih) lai a ni.
Mizote hunpui Krismas 2022 kan lo thleng chho leh dawn hnai ta a, heng kan hunpui hi Pensioner ten hlim tak leh thlamuang taka an hman ve ngei theih nan an pension pawisa hi Krismas hma ngeia pe tur leh chinfelsak vek turin Congress Thalai chuan kan phut tlat che a ni.
MPYCC aiawhin,
(S. LALRINAWMA)
General Seretary,Ph : 9862326293
