Mizoram chhunga ruihhlo hluar zel dona peng pakhat atan Mizoram Police chuan tukin (ni 01.06.2024) Inrinni dar 7:00 khan Aizawlah Walk for Drug Free Mizoram” a buatsaih a. Chanmari kawn atanga AR Ground thleng kawng zawh a ni.
Kawngzawhnaah hian zing karah Anil Shukla, IPS, DGP Mizoram chuan inlawmna thu sawiin, he hun hi Mizoram mipuite drugs dona kawnga kan rilru kan siam tharna atan leh kan tanrualna lantirna atan buatsaih a nih thu a sawi a. Kawngzawh hi zing dar 7:00-ah Chief Minister Lalduhoma chuan Chanmari kawn atangin a vailiam a ni.
Lammuala a kharna hun tawite hmanah Lalduhoma, Chief Minister chuan tun hnaiah ruihhlo vangin mizo thalai, a bikin mipa kan thih nasat thu a sawi a. Ruihhlo dona kawngah Sorkarin theihtawp a chhuah mek thu leh “Core-Committee on Ruihhlo do” pawh din thar anih thu leh chak taka hmalak chhoh anih thu a sawi.
Khual zahawm K. Sapdanga, Home Minister pawhin sorkar hnathawk, Kohhran, NGO, zirlaite leh Mizoram mipui zawng zawngte thu khat vuaa ruihhlo do turin a sawm a. Ruihhlo khawih thin tlemte te avangin kan society in harsatna a tawh mek hi kan tanrual chuan kan ti ziaawm thei a ni tih a sawi bawk.
Lalnghinglova Hmar, Excise & Narcotics Minister, khual zahwm ni bawk chuan, he hun buatsaihtute fakawm a tih thu bakah, hetianga thawhhona tha kan neih chuan Drug awm lohna Mizoram siam tura hma kan sawn zel tur thu a sawi a. Mizo mipuite ruihhlo dona kawnga tangrual puiah a sawm bawk.
‘Walk for Drug Free Mizoram” kawng zawhah hian mi 1000 chuang an tel a, an zingah hian sorkar mi pawimawh tak takte, dan kengkawhtu te, tlawmngai pawl hrang hrang aiawh leh zirlaite an tel a ni.
He mi pual hian zirlaite tan lemziak intihsiakna ni 30.5.2024 (ningani) khan SP Aizawl Conference Hall-ah buatsaih a ni a, theme chu “Drugs free Mizoram. Yes, I can” a ni. He intihsiaknaah hian Sikul 19 atangin zirlai 84 (High School zirlai 44 leh Higher Sec School zirlai – 40) lai an tel thei a ni. Khuallian Lalduhoma Chief Minister chuan lemziak intihsiakntihate lawmman a sem nghal bawk a ni.
Lawmman dawngtute :
High School Section :
1st – Lalnuntluanga Ralte, St.Paul’s High School.
2nd -Jessy Lalruatfela, Synod High School.
3rd – Penny Lalhmingsangi, St.Paul’s High School.
Higher Secondary School Section :
1st – H. Malsawmdawngzuala, St.Paul’s Higher Secondary School.
2nd – Emelda K.Laldinthari, St.Paul’s Higher Secondary School.
3rd – Lalthlamuanpuii, K.M. Higher Secondary School.
