CM-in Aizawl North High School building hawng

Aizawl June 26 : Chief Minister Zoramthanga chuan Inrinni khan Thuampui ah Aizawl North High School building chu a hawng a. HSLC Pass Lawmna Programme Thuampui YMA Hall a buatsaih chu hmanpuiin, “Sawrkarin zirna ngaihpawimawhin, tihchangtlun zel tum a ni,” a ti.
Aizawl North High School building thar hawn chu a lawmpui thu sawiin Chief Minister chuan, kumin an Board exam result pawh fakawm a ti a. Zirlaite taimakna bakah zirtirtute inpekna leh nu leh pa te tawiawmna a lantir thu sawiin, result tha tak an neih belh zel a duhsak thu a sawi. Chief Minister chuan thalaite chu zirna kawnga theihtawp an chhuah laiin an nun hloh lo a, inthunun tlat turin a chah a. Tunlaiah chhungkua leh khawtlangah hlimlohna, buaina, khawsak harsatna leh buaina thlentu langsar tak chu zu leh ruihhlo a nih dan sawiin, thalaite chu chung lamah chuan inzuah fihlim tlat turin a chah a. Heng thilte hi Siamtu in kan nih tur a duan ang ni phalo a min dahtu a nih dan a sawi.
Khualzahawm School Education Minister Lalchhandama Ralte chuan Thuampui khawtlang chu zirna an ngaihpawimawh avanga hma an lak dan chu fakawm a tih thu a sawi a. HSLC exam 2022 a pass-te chu a lawmpui thu sawiin, tun hi an bultanna chauh a la ni tih hria in, an kal zelna turah danglam ngam in, theihtapw chhuah a, mahni inthununna nen tumruhna nasa tak nen kal zel turin a chah a ni. Education Minister chuan hripui leng avanga school mumal taka a kal theilo karah board exam hlawhtling taka Mizoram Board in a kalpui thei chu thil ropui tak leh state dangte lakah pawh chhuan tham a nih thu sawiin, mipui leh sawrkar thawhhona zar a nih thu a sawi a. Ram hmasawnna atan education chu lungthu pawimawh tak a nih avangin zirna lama theihtawpa sawrkarin hma a lak zel tur thu a sawi a. Zirna peng hrang hranga hmasawnna bakah hnam ziarang hriatchianna leh mahni nihna a nghet tlat a kan awm a pawimawh thu sawi bawkin, chumi atan chuan elementary level a subject thar “Zonun” chu dah a nih thu a sawi bawk.
Aizawl North High School building vawiina hawn tak hi March ni 24, 2021 khan sak tan niin thla tum chhung vela sak zawh a report a ni a, November ni 1, 2021 khan luah tan a ni. Assam type chhawng khat, 24×45 feet bial a zau a ni a. A sakna tur hian Fund raising committee din in Local Council, NGO leh khawtlang mipui atanga vehbur khawn a ni a. Sum sen tawh zat chu cheng 11,23,353 a ni. He High School hi a hma in Bawngkawn Chhim Veng a awm thin niin, chumi hnuah Chaltlang Ruam Vengah sawn a ni.