Tukin zingkar khan Nasha Mukt Bharat Abhiyan (Drugs Free India Campaign) Mizoram State Level leh Aizawl District Level bultumin Aizawlah School leh College hrang hrang atanga zirlai 600 chuang ten kawngzawh (Rally- Fight Against Drugs) an nei a. Chief Minister Pu Lalduhoma chuan a telpui.
Hmun hnih, Chanmari leh Sikulpuikawn atangin kawng hi zawh a ni a, Lammualah lut khawmin Rally kharna buatsaih zui a ni. Chanmari atanga kawng zawhte hi Chief Minister hian a vailiam a, an zingah tel ve nghalin Lammual thlengin a kal.
A kharna inkhawmah hian thu sawiin Chief Minister chuan, Mizoram hi ruihhlo siamna hmunpui Golden Triangle an tih mai depa awm kan ni a. A kal kawnga awm kan nih vangin ruihhlo hi hmuh tur a tam thin. Nimahsela, ruihhlo hian eng thil tha mah min pek loh avangin, kan ban phak lekah awm mah se kan ti ve tur a ni lo. A ruka zuarte pawh hi khawtlang hian hnawl ngam ang u. An phu tawk hremna hmu ngei rawh se. Mipuite tang tlang ila, he thil tha lo tak lakah hian kan hnam hi veng him ang u. Kan thalaiten eng ruihhlo mah hi lo ti chhin suh u. Tih chhin hi a bawiha luhna kawngka a ni, a ti. Ruihhlo bawiha tang mekte pawh huaisen taka kalsan ngam turin a fuih bawk.
Khualzahawm Pi Lalrinpuii, Health Minister leh Excise & Narcotics Minister Pu Lalnghinglova Hmar te pawhin thusawina hun an hmang bawk.
Tukina kawngzawhte hian placard an keng a, an au rual bawk a. Placard siamtute tan inelna buatsaih a ni a, lawmman dawngtute hnenah lawmman hlan nghal a. Miss Vanlalnuntluangi, Miss Grand India kaihhruaiin kal khawmten thutiam (Pledge) an nei bawk.
Nasha Mukt Bharat Abhiyaan (Ruihhlo Tello India Campaign) hi India ram chhung district 372 ah kalpui mek a ni a, Mizoramah hian District zawng zawngah kalpui a ni. He campaign hian ruihhlo that lohzia zirtir leh a la ti ve lo te venhim hi a tum ber a ni. Nasha Mukt Bharat Abhiyaan kum nga na (5 years) denchhen in Central Ministry chuan India ram pumah nasa taka campaign hi kalpui turin ruahmanna a siam a. Aizawlah pawh he rally (kawngzawh) hi buatsaih a ni.
