Aizawl April, 25 : Chief Minister Pu Zoramthanga chuan vawiin khan Mizo Academy of Letters (MAL) din champha (Foundation Day) puala a lawmna hun Assembly Annex Conference Hall-a an buatsaih ah khuallian niin a hmanpui a. Mizoram Legislative Assembly Speaker Pu Lalrinliana Sailo chu khualzahawm a ni.
Chief Minister chuan ram buai avanga economy chauh nilo, literature thlenga Mizoramin a tuar dan te, hun lo kal zela hma kan sawn dan leh vawiin thlenga hrileng leh harsatna hrang hrang karah Mizo literature tui leh hmasawnna duhtu thahnem tak an awm chu lawmawm a ti a. Thu leh hla thian chu thil awlai lo tak, mi nazawngin thiam thil a nih loh dan te, hnam ziarang humhalh naah te, hnam tawng tihhmasawn leh zirchianna kawnga thu leh hla lama kan mithiamte pawimawhna Chief Minister hian a sawi a. Ram hmasawnna thlenga an pawimawhna sawiin Chief Minister chuan ziakmite chu an thuziah ah a eng lam, a ‘positive’ zawnga ziak hram tum turin a chah a. Mizoram chungchang ziaktu in a thalo lai leh tha lai ziah tur tam tak a hmuh tur thu sawiin, hmasawnna rilru put erawh chuan thatna lam ziah tam a, chumi kan thatna chu umzui zel in, hmasawnna raltiang kan kai theih tur thu a sawi a ni.
Chief Minister chuan Book of the Year 2021 atana thlan ‘Hnam Ropuite U Tho R’u Le’ ziaktu Lalhruaitluanga Chawngte hnenah Chief Minister hian lawmman a hlan a. MAl website thar- mizoacademyofletters.com/ chu tlangzarhin, Pi Lalbiakzami lehkhabu ziah ‘Biakzami Biahzai’ tih chu a tlangzarh nghal bawk a ni.
Speaker Pu Lalrinliana Sailo chuan ziakmi kalkhawmte chu mi chhuanawm tak tak an nih thu sawiin, ram siamthat kawngah pawh an pawimawh a tih thu a sawi a. Ziak leh chhiar a tui mite, chhiar zau tak takte hi eizawnna kawng hrang hrangah pawh rawn tlak an nih fo thu a sawi a. Zonun zemawi chhawm nun zel pawimawh a tih thu sawi telin, kan thu ziak, a bik takin social media lama thu kan vawrhdarh dunah inenlet ngai tam tak awm nia a hriat thu a sawi a ni.
Assembly Speaker hian lehkhabu pathum – ‘Khawvel Indopui 2-na’ C. Lalaudinga ziah te, ‘Mizo hla leh a phuahtute’ B. Lalthangliana ziah te leh ‘Mizo Nun Hlui – Lemchan Pathum’ tih Lalthangfala Sailo ziak te chu a tlangzarh a. Mi paruk hnenah MAL Life Member Certificate a hlan bawk.
MAL Foundation Day lawmna inkhawm hi MAL President Prof. RL. Thanmawia chuan kaihruaiin, MAL Secretary atangin leh Book of the Year 2022 Secretary hnen atangin report ngaihthlak a ni a. Book of the Year 2021 dawngtu hnen atangin thusawi tawi ngaihthlak a ni a. Sr. Adviser Pu B. Lalthangliana chuan lawmthu sawiin hun a khar a ni.
Mizo Academy of Letters-in Book of the Year a thlan hmasak be atanga chhutin lawmman dawngtu mi 27 an awm tawh a, vawi hnih dawng hi mi panga an awm bawk. Bangalore Mizo Christian Fellowship-in vawi khat a dawng tawh bawk.
