Aizawl August 3 : Chief Minister Zoramthanga chuan vawiin khan PAMRA (Peace Accord MNF Returnees Association) Remna Run Lawi ni champha vawi 36-na leh Inremna (MOS 1986) vanga MNF kirte hriatrengna hming ziahna lungphun hawnna Luangmual-ah a hmanpui.
Luangmuala Remna Run Lawi hriatrengna lungphun bulah Inremna (MOS 1986) vanga MNF kirte hriatrengna hming ziahna lungphun hi a ding a. Luangmual YMA Hall-ah hemi pual inkhawm neihah Chief Minister chuan remna thuthlung ziah avanga ramhnuai atanga lo kir te an luhna cham lawmawm taka thangtharten anmahni an hriatrengna atan lungphun siam a ni chu lawmawm a tih thu a sawi a. Mizoramin remna a neih theih nan a kawng hrang hranga theihna chhuah a hmalaknate a hlawhtlinna hmuh tak, vawiin thlenga remna leh muanna kan neih phah taka chu vawnghim zel turin a chah a ni.
He hunah hian Deputy Chief Minister Tawnluia leh Deputy Chief Whip Lalrintluanga Sailo te pawhin thu an sawi a ni.
PAMRA chuan Remna Run Lawi hriatrengna pual leh General Assembly vawi riatna hun an hmannaah hian resolution siamin, “Kum tam tak kan lo dil tawh Housing Assistant (H/A) hi Mizoram sawrkar (MNF Ministry) hian tun Term chhung ngei hian min pe rawh se,” an ti a. Chawhma lamah kum 2022- 2024 chhunga an pawl hruaitu thar thlangin, heng mite hi an thlang chhuak a ni. President – B.Zorampara ; Vice President- Zoramsiama; Treasuser- Lalbiakliana te an ni.
Leave a Reply
-iOS Version