Finance minister Zoramthanga, Chief minister chuan Mizoram sawrkar hnathawk ten Dearness Allowance (DA) pung an ngiat mek chu pe thei dinhmunah sawrkar a ding ngang lo tih a sawiin, Tun dinhmunah Mizoram chu state hrang hrang zingah leiba nei tlem 2 na a ni tih a sawi.
Chief minister chuan Sorkar flagship programme SEDP chungchang sawi bawkin, beneficiary 60,000 te hnen a first installment Rs. 25,000 pek tawh chu tun financial year chhungin 2nd installment Rs. 25,000 pek leh an ni dawn tih a sawi a, financial year tharah pawh a dawng tur thlan an nih leh tur thu leh chu erawhchu committee lamin an la ngaihtuah tur thu a sawi.
Assembly Session a budget a pharh zawh-ah vawiin khan Chief minister hian Conference Hall, Assembly Annexe building a thuthar thehdarhtute kawmin, 2023-24 a state sawrkar thawh chhuah atanga sum lak luh, state’s own revenues atanga hmuh beisei zat chu Rs. vbc. 1981.29 a ni tih sawiin, chu chu kum kal mek 2022-23 a beisei Rs. vbc. 1637.73 atanga tehin 20.98% in a pung tih a sawi.
Thuthar thehdarhtute zawhna chhangin finance minister chuan, sawrkar hnathawk ten DA tihpun an ngiat mek chu pe thei dinhmun-ah sawrkar a ding rih lova, “Pe i la, finance in a tuar dawn a ni” a ti.
Sawrkar hnathawkte hlawh pek tlai thin an nih chungchang pawh zawhna chhangin, a hma thei ang ber leh a hun tak a pek thin chu sawrkar duh dan leh a hmalak mekna a ni tih sawiin, “Pawisa min pe tute hian min pe tlai a, chuvangin keini pawhin hlawh kan pe tlai ve a ni,” a ti. Sawrkar hnathawk ten hlawh an lak tlai vanga bank loan rulh kawng a harsatna an tawh pawh sawrkarin bank lam hotute hnenah ngenna thlenin, bank lam pawhin an hrethiam viau nia a lan thu a sawi.
State sawrkarin leiba a neih chungchangah thuthar thehdarhtute zawhna chhangin finance minister chuan, India ram state zingah Sikkim chu leiba nei tlem ber an nih thu leh Mizoram chu pahnihna a nih mek thu a sawi.
