Commonwealth Games-a medal dawngte chawimawi

Aizawl August 22 : Commonwealth Games 2022 Birmingham a kumin a neih zawh taka India ram aiawh a kal zinga Mizo medalist pahnih – Weightlifting 67 kg a Gold Medal latu Jeremy Lalrinnunga leh Women’s Hockey a Bronze Medal latu Lalremsiami te chawimawina Vanapa Hall ah Zirtawp zan khan buatsaih a ni a. Chief Minister Zoramthanga chuan a telpui.
Gold medal dawngtu Jeremy Lalrinnunga hi Mizoram sawrkar chuan cheng nuai 25 a pe a. Bronze Medal la tu Lalremsiami hi cheng nuai 7.5 a pe a ni.
Chief Minister chuan medalist te pahnih a lawmpuina leh an hlawhtlinna chu ropui a tih thu a sawi a. Hlawhtlinna chang tura an beihna leh tumruhna leh an chhungte tawiawmna chu fakawm a ti a. Chief Minister chuan mahni chawr chhuahna chhungkaw khawsak san leh san loh chu hlawhtlinna leh thlen chin hriltu a nih vek loh thu a sawi a. Mihringte hi thiamna leh theihna neia siam vek an nih dan te, thiamna inang reng pawh a hmangtu in a hman dan azira mi hlawhtling leh hlawh tlinglo, thleng thui leh thuilo te inthlauhna a siam thin thu a sawi a. Kan nih theih kan potential thleng tur chuan tumruhna nen theihtawp chhuah a, theihna kan nei tih inhre chunga ke pen a pawimawh thu te a sawi a ni.
Home Minister Lalchamliana pawhin he hunah hian thu sawiin, sports ah thlen san leh ram hmasawnna hi kal kawp a nih thu a sawi a. Tun tuma Mizo medalist te pahnih chu an thalaipuite tana entawn tlak an nih thu a sawi a. Infiamna chauh ni lo, khawvel nun kawngah hian hlawhtling turin thil tam tak a awm lo – tumruhna, in pek zawhna, nghah peihna, mahni inthununna te hi hlawhtlinna kawngah min kaihruaitu a ni, a ti a. Thalai kalkhawmte chu an tun hun hmang tha a, an nakin hun tur atan tun atanga inbuatsaih sauh sauh turin a chah a ni.
Sports & Youth Services Minister Robert Romawia Royte, program thlengtu chuan Mizoram sawrkarin sports chawisan ngaipawimawhin, thalaite mamawh phuhrukna tur theih ang ang – hmasawnna ruhrel din kawngah leh kawng danga theihtawp chhuah a nih thu a sawi a. Medalist te pahnih chawimawina zanina pek chu an thlen chin tur an thlen tawh vang ni lovin, hma an sawn belh zel theihna tura hualna a nih thu a sawi a. Hetia cash award pek chungchangah hian Mizoram sawrkar chuan kalphung mumal tam a siam chhoh zel dan te, incentive scheme pawh a changtlun zawk nan a ennawn a nih dan te a sawi a. Sports Minister chuan October thla chho ah NE Olympic games hmachhawn tura Mizoram sports association hrang hrangte tha taka inbuatsaih tura a duhsak thu a sawi bawk.
Chawimawina-ah hian Bronze Medalist Lalremsiami, Hockey Player chuan a thalaipui ten a thlen aia sang zawk pawh an thleng thei a, infiamna khawvelah hian remchanna kan neih phawt chuan khawvel huapah chungnung takin a awm theih thu sawiin a thalaipuite a fuih a. Gold medalist Jeremy Lalrinnunga, Weightlifter chuan infiamna lamah kan kal emaw, zirna lamah a ni emaw hlawhtling tur chuan kan tum ah chiang ila, midangin an tih ve vang ringawt lovin mahni tan bei zawkin, thawhrim piah lamah mahni invawn a pawimawh a tih thu te a sawi bawk. Zothankimi, Hockey Mizoram President leh Lallianthuama, Mizoram Weightlifting Association President ten medalist te hlawhtlinna kalkawng an sawi a ni.
Program hi SYS Secretary Dr. Lalrozama chuan kaihruaiin, Sports & Youth Affairs, Tourism & ICT Board Vice-Chairman TC Pachhunga chuan lawmthu sawiin hun a khar a ni.