National highway No. 6 & 306 four lane-a siam tura ram laksak tur, compensation dawng turte chuan tun thlenga an dawn tur tihkhawtlaisak an nih avanga lungawiloh lantirin tukin zing dar 6.00 atang khan tiamchin awm loin Vairengte ah kawngpui an dang a, a ni khatnaah hian boruak duhawm lo thleng a awm lo.
Kolasib District Land Owner’s Association hruaitute chuan, kawng an dan avang hian boruak muanawm lo a thleng hran loa, November 2 tlai dar 5 thleng kha chuan) sawrkarin mi pali aia tam punkhawm phal lohna Section 144 of the Criminal Procedure Code (CrPC) emaw dan tlawhchhan dang emaw puanhnan a nei rih lo.
Kawngpui an dan hi, Mizoram atanga Silchar lam pan lirthei chu an dang tel loa, Assam lam atanga rawn chho erawh, an tualchhung chanchinbu ah te kawngpui dan tur thu hi an chhuahtir ve avangin rawn paltlang tum an awm meuh loa, kawng laka tangkhang pawh an awm lo tluk a ni tih an sawi. Chutihlaiin Aizawla exam tur, Guwahati atanga night bus-a rawn chho zirlaite chu, an bus hi tlangtir lo mah se, zirlaite hi Vairengte atangin maxi cab hmanga an kaltlang an phalsak tih an sawi a. Midang erawh indan buai ngai an awm meuh lo tih an sawi.
Sawrkar atangin thuthar dawn an nei loa, magistrate hoin police 20 velin an vil a, anmahni chu kawng dang tura thawkchhuak mi 650 vel niin, kawng dan hi tiamchin awm lo a nih avangin zan (Ningani zan) a duty tur mi 100 vel an inruat tih an sawi a ni. “NHIDCL hian ram neitu chungchangah hian hlauhthawn an nei tawh a, Revenue department-in pass a lo pek tawhte kha Forest department-in an ram (forest reserve) niin an lo sawi leh bawk si a, hei vang hian state sawrkar lakah hian rinna nghah ngam har an ti tan a, four lane tur pawh hi a nihna ang tur kan hmu loang tih hi, kan compensation nawr piahlamah hian hlauthawn kan nei tel tawh a, NHIDCL hian mimal ram neite leh state sawrkarah hian compensation pek double a ngai ang tih a hlau a ni,” tiin, Mizoram sawrkar chuan compensation pekchhuahna tura an mutan, an harsatna dik tak chu tlang takin hrilh mai se, tih chu an thil phut pakhat a ni tih an sawi.
