Congress Ṭhalai Hqrs(MPYCC) in vawiin khan tunhnaia mipuite hnena ration buhfai pek tihdanglam chungchangah President Dr.Lalmalsawma Nghaka hovin Congress Ṭhalai hruaitu ṭhenkhatten Food Civil Supplies & Consumer Affairs Department, Directorate an tlawh.
He hunah hian Dr.Mala chuan statement siamin, “Central Sorkarin National Food Security Act 2013 a hman ṭan aṭangin Priority HouseHold (PHH) (Card Pawl) te tan kg 5 Rs. 3 in Central Sorkarin a rawn tum sak thin a. Mizoram Sorkarin khamkhawp lo ven nan kg 3 PHH Beneficiaries te tan AAY rate-in a pe tel thin bawk a ni (Total 8 kgs). December ni 24, 2022 khan Union Cabinet chuan thuchhuahin NFSA hnuaiah Pradhan Mantri Garib Kalyan Ann Yojana hmangin, December 2023 thleng PHH Beneficiaries (Card pawl) te tan mi pakhatah Kg 5, leh AAY (Card eng) te tan card khatah Kg. 35 a thlawnin buhfai a sem tawh dawn a ni.
Hei hi a lawmawm em em rualin, Mizoram Sorkarin PHH Beneficiaries te tan mi pakhat tan kg. 5 an khawp kham lo tih hriaa, an khamkhawp lohna phuruk nan AAY rate a Kg. 3 a pek ṭhin a tawp dawn nia a hriat avangin Mizorama chhawmdawl mamawh ber miharsa zawk leh dinhmun thalo zawk mangang taka a siam hi MPYCC chuan pawi a ti takzet a ni.
Mizoram sorkarin chhawmdawl leh ngaihven hlawh ngai ber (Most Vulnerable) te tan kg 3 AAY Subsized rate a an lak chhunzawm theih nan a ruahmanna a siam lo tak tak anih chuan Congress Thalai chuan a en liam mai mai dawn lo a, a ṭul angin miharsa zawk te leh chhawmdawl ngaite tan MPYCC a ding zel dawn a ni tih MNF Sorkar kan hriattir a ni.
Mizoram Sorkarin sum a enkawl thiam loh em avanga Mizoram mipui miharsa zawk leh chhawmdawl ngaiten harsatna tawk thei dinhmuna an ding mek hi MPYCC chuan pawi a tiin, lungchhiat thlak a ti takzet a ni.
MNF sorkarin uchuak taka an duhsak zawngte an vur avanga sum vaibechhe za tel, Mizoram Sorkarin kumtin a hmangral hi mipui hian kan hai lo a. Congress Sorkarin Financial Management ṭha, Mizoramin a neih theih nana Board tam tak sum renchem nana a tihtawp, MNF Sorkarin a duhsak zawngte dinhmun a siam sakna atana Mizoram mipuiin an hnawl tawh VIP Culture chhawm nung thar a, engmah thawk chhuak si lo a MNF Party MLA leh hruaitu lawk te ṭhi beh tir nana phuahchawp taka a din, SEDP Board atana vaibelchhe tel mipui sum sen ral a ni ziah hian Mizoram mipui an hmangaih lohzia a ti lang chiang hle. Lalchhungkua te in hai vur nana Restricted tender hmanga Mizoram Mipuite Sum tlingkhawm an suasam te hian mipui rilru a ti na takzet a ni.
MNF Sorkar hian thla tlemte Sorkarna hun leh mipuite tan rawngbawlna hun tlemte an la neih hi Mizoram Mipuite tan THIL ṬHA ti ngam tawh turin kan chah nawn a ni.
