Vawiin May ni 29, 2023 (Thawhṭanni) khan Congress Ṭhalai Hqrs. (MPYCC) chuan an Sr.Vice President Ngurdingpuia Pachuau hovin Chief Minister Zoramthanga hnenah lehkha an thehlut a, CM hi a lo awm loh avangin a PS hnenah an thehlut a ni. An lehkha thehluhah chuan Kolkata Ballygunge Mizoram House hralh tum a nih chungchang te, Manipur aṭanga kan unau raltlan-te chhawmdawl tura Mizoram sawrkar an phutnate leh Covid hrileng avanga sawrkar-in sum a dawn chungchang leh chûng sum-te a hman dan mipui hmaa puangzar tura an phutnate a tel a ni.
An lehkha thehluhah chuan…
To,
The Chief Minister,
Govt. of Mizoram,
Aizawl : Mizoram.
Subject: Ballygunge Mizoram House, Manipur Raltlan leh Covid Aid Fund Chungchanga Rawtna leh Zawhna.
Ka pu,
A hmasain Mizoram Pradesh Youth Congress Committee (MPYCC) aiawhin chibai ka buk a che. Mizoram sawrkar tluang taka i kaihhruai zel theih nan duhsakna ka hlan bawk a che.
A chung subject-a kan rawn tarlan ang hian Kolkata Ballygunge-a Mizoram House chu tihral tum a ni tih leh e-tender hmanga hralh tum a ni tih kan lo hria a. Sawrkar-in Ballygunge-a Mizoram House tihral a tum hi keini Mizoram Pradesh Youth Congress Committee (MPYCC)-te chuan tha kan ti lo nachungin kan do ngawr ngawr lo va, amaherawhchu, tihral a nih hma hian hralh a ngaih loh nana tih theih awm ang angte tih hmasak phawt ni se kan ti a. Chu chu Kolkata Municipal Corporation hnuaia an building regulation (G-3) hi inngaihhnathiamna awm thei lo tawp a nih kan ring lo va, Salt Lake-a Mizoram House sak a nih dawn pawh khan tuna sak a nih ang thlap khuan sak phal a ni lo va, mahse, khatih hun laia kan Chief Minister Pu Lal Thanhawla khan hriatthiamnate dil-in tuna an sak ang khuan sak an phalsak ta a ni. State pakhat dilna chu an zahsak em em ang tih kan ring tlat a, tin, chhuanlam dang dangte pawh hei leh chen hi mikhual-te an lo lawilut tawh a, harsatna lian tham an tawh a panna kawng thlengin a la awm lem lo niin kan hria a, chhuanlam mai mai niin kan ngai a ni.
Pawi kan tih em em chu, kum 2019-a sak that lehna tur ruahmanna leh phalna pawh a awm hma hauha a in (building) thiah (dismantle) a ni kha a ni a. Tu emaw hlawkna tur niawm taka lang theia khatia engmah tihfel a nih hma leh luah tlâk a la nih reng laia thiah a ni kha pawi kan ti em em a. Khatianga mimal hlawkna tura tih nia lang theia thil a kal kha thleng leh ngai tawh lo se kan ti hle a ni. Tunah hian Salt Lake Mizoram House-ah khum (bed) 89 leh New Town-ah khum 78, a belhkhawmin khum 167 a awm a, hei hi kan indaih lo a nih chuan ngatinge sak that phalna pawh la hmasa lo leh thil tul tifel hmasa lova Ballygunge Mizoram House kha thiah (dismantle) a nih ngawt tih hi kan hre duh bawk a ni.
Tin, tihral a nih dawn chuan tihral a nih hmain tihfel hmasak tur leh ngaihtuah fel hmasak tur awmin kan hria a. Chungte chu –
(i) Tihral a nih hma hian a ai awh zo tur hmun (ram) thlan fel hmasak emaw, hauh fel hmasak
vek pawt ni se, a neitute biak fel hmasak vek phawt ni se kan ti.
(ii) A ai awh tur ram man (price) leh a building sakna tur zat (proposed amount) hriat hmasak
phawt a, chumi khuh (cover) theihna tura hralh/tihral ni se kan ti.
(iii) A ram hralhnaah hian mang tang ei (middle man) awm thei lo tura tih ni se kan ti bawk.
(iv) Ballygunge Mizoram House Survey Team, Mizoram sawrkar-in a din a nih chuan tute nge
an nih tih leh an hmuhchhuah (findings) mipui hriata tlangzarh ni se kan ti bawk.
A dawt lehah chuan Manipur atanga kan Zo hnahthlak unau râltlânte hi nasa taka chhawmdâwl an ngai a, kan hriat theih chinah tun thlengin chhawmdawlna tih tham sawrkar atangin an la dawng lo va, nunau la chhangchhe tak tak, an thuamhnaw inbel lai nen chauha rawn tlânchhe lût te an ni a. Thuamhnaw hâkthlâk takngial pawh nei lo an ni a, chuvang chuan, a rang thei ang berin sawrkar hian chhawmdâwlna pe se kan ti bawk a ni. Manipur hi a buai chin tur hriat a ni lo va, heng kan unau Manipur atanga rawn râltlân-te hi eng chen nge Mizoram-ah an la awm dawn hriat a nih loh avangin anmahni chhawmdâwlna tur hi Central sawrkar-a dil ni se, India khua leh tui an nih angin Central sawrkar pawh che ngei tura na taka nawr ni se kan ti bawk. Tin, anmahni’n a râlmuang tâwka an hriat hma chu Mizoram atanga chhuahtir loh ni se kan ti bawk a ni.
A tawp ber atan chuan, Covid hripui-in Mizoram pawh min nuai nasa em em a nih kha, khawtlang, kohhran leh mimal-te inpekna leh tlawmnai pawl-te thawhrimna avangin Pathian zarah chhiatna nasa lutuk thleng lovin kan paltlang thei a nih kha. Khatih hunlai khan thil tul leh sum sên ngai zawng zawng kohhran leh khawtlangin an tum deuh vek a, Central atanga Covid pual pawisa lokal leh kohhran, mimal leh pawl hrang hrang atanga Covid puala CM Relief Fund-a pawisa lut tam tak, hman tur awm reng hman tangkai a ni lo kha kan hrethiam lo hle a, khâng pawisate kha thil dangah hman ni lo se kan ti bawk a ni. Central atangin Covid tanpuina sum tum riat (8) a lokal niin kan hria a, a vaia belhkhawmin Rs.79,62,88,000 (cheng nuai sang sarih zakua sawmruk pahnih leh sing riat sang riat) leh CM Relief Fund-ah Rs.26,79,80,470 (cheng nuai sang hnih zaruk sawmsarih pakua leh singriat zali sawmsarih) te kha a hmanna tur dik taka hman ni ta se Covid hripui kha kha ai khan kan tuar na lo daih ang tih kan ring a. Heng pawisa-te hi hman lohin a la awm a ni loh chuan a hmanna mipui hnena puangzar turin kan ngen bawk che a ni.
Ram tana i thawhpui,
Sd/- (NGURDINGPUIA PACHUAU)
Sr. Vice President
