September ni 8, 2023 (Zirtawp) zan khan Hyve Studio, Tuikualah Dr. Vansanglura, Principal, Serampore College lawmluh inkhawm neih a ni a. He hun hi MPCC President Pu Lalsawta’n a hmanpui.
Pu Lalsawta chuan, kan la tawn ngai loh, tawn zen zen loh, mi duhawm leh huaisen, Dr. Vansanglura chu ram leh hnam tana hnathawk turin, thawk rim turin, tuar tur te, tlakchham ngam tur leh mahni inhlan ral thak ngam turin Congress party ah kan lawm lut a ni, tih sawiin, Congress party a zawm chhan, kan ram, kan hnam leh kan sakhaw tan a ni, a ti.
Hnam tlem te, India rama sakhaw lian Hindu, Muslim leh Sikh sakhaw dang tam tak karah Christian zaa pahnih vel kan awm a. Chung chu kan ram ro inrelna atana kan danpui thu bul (preamble)-ah Sakhaw zalenna (Secularism) kum 1976-ah Congress hruaitute’n an ngaih pawimawh em avangin, a hma pawha awm ngai lo chu dah a ni, a ti a, “Hei hian kan ramah kawngro a su hle. Kum engemaw zat Pathian leh a kohhran rawngbawla zalen tak leh hlim taka kan awm laia, Missionary kan tirh chhuah zawng zawng te pawhin sakhaw zalenna an neih a, miin an lo hriatthiam a, an lo tihduhdah lohna tur te, mihrungte tana Lal Isua chanchin tha kawng hrang hrang hranga an theih darh theuhna tura zalenna chu tunah chuan kan lo ral ti ta a, a pawi takzet a ni, a ti.
Pu Lalsawta chuan, thla tlem te hnuah inthlan kan hmachhawn thuai dawn. Inthlan hmachhawn turin party thenkhat chuan sum ngah te hi hmanraw tlingah an ngai a, an in nghat a. Party dang chuan BJP chakna leh pawisa hmanga sorkar an tum. Keini chuan hetiang hi kan nei loa, kan thei lo, a tum pawh kan tum lo. Kan innghahna chu Pathiana a ni a. A lam kan hawi mai a ni. Pathian lam kan hawi a, kan mamawh leh kan duh a hnenah kan thlen a, a duh zawng tih tuma rilru dik pu-a kan theihtawpa kan campaign chuan Pathianin kan lakah a beng a chhi ang a, mal min sawm ngei ang tih hi kan innghahna a ni a. Tuna kan inlawmluh pawh hi amah min hnaih tirtu a ni. Hindu lal ram din tumtute lakah kan kan ram, kan hnam, kan sakhua a him theihna tura tangrual turin Mizoram mipui ka sawm a ni, a ti bawk.
Dr. Vansanglura pawhin thusawiin, India zalenna sual chhuaktu party Congress a zawm chhan chu Lal Isua chanchin tha la hre lo te hnena nasa zawka hril a nih theihna tura kawng sial a ngaih vang a ni a, chutiang tur chuan Serampore College a thawkte pawh khawtlang leh ram siamthatna tura Politics tel phal sak an ni tih sawiin, William Carey-a thutthlenga thut leh ram leh hnam siamtha tur ke penchhuah hi a in mil hle a. Kei pawh a hnung zui turin ka pen chhuak a ni, a ti.
Dr. Vansanglura chuan, tunah hian India ram leh Mizoram hian eng kawng nge kan zawh dawn tih zawhna hi kan in zawh a hun takzet tawh. Kan ram, kan hnam, kan sakhua hmalam hun thui tak hriltu tur Inthlan kan hmachhawn mek. Ral khata thlir mai mai a hun tawh lo. Sakhaw zalenna palzut a, Democracy lungphum pawimawh tak sawinghing tu, kan zalenna tih chhia a, kan sakhaw hmun tihchhetu leh kan hmun thianghlim ti bawrhbang a, kan unaute chunga rawva taka che Hindu lal ram tundin tuma BJP chakna chhu chat theitu chu Congress Party a ni.
Min nghaisatu leh min nekchep a, min chimral tuktu BJP lo thawhpui duhtu leh thawhpui tura thuthlung ziaktu an awm ta hi a pawi takzet a. BJP thawhpui leh pui loh tur chiang lo te chungah innghah ngam a ni loa, heng mite hnena risk lak loh a him ber. Hindu lal ram dintumtute thawhpui ve miah lo tur, BJP kan thawhpui dawn lo tia sawifiah fo ngai lo, Pu lalsawta kaihhruai Congress kut tih chak hi kan ram, kan hnam leh kan sakhaw tan a tul takzet a ni, a ti bawk.
He lawmluh inkhawma Hunserh hmangtu Rev. Father Joseph Lalbiakthanga, Vicar General, Parish Priest Cathedral Church, Aizawl pawhin, Mizoramin sorkarna chelhtu Party hrang hrang kan nei tawh a. Duh ang diak diaka hmasawnna min pe K her lo mahse sorkar kal tawh te’n hmasawnna hna nasa takin an thawk a ni. An hnathawh chhawrtu Mizoram mipui kan ni a. Engmah tih nei lo leh Mizoram hi chhe ta viau leh midang phak lo lutuk anga inchhuah hi a dik lo. Chuvangin nasa zawka hmasawnna kan beisei nei tura kan rilru kan tih chak a, rilru dik kan put a ngai. Kan sakhua, kan ram leh hnam humhim hi tuna kan tih mak mawh a ni, a ti bawk.
Lawmluh inkhawm hi Zonuni Pachuau in a kaihruai a. Pu C. Lalhriatpuia, Chairman, Social Mediaa Department in Dr. Vansanglura chanchin tawi sawina hun hmangin One in Christ te’n Pathian Fakna hla hmangin hun an hmang bawk a ni.
