Mara Autonomous District Council inthlanpui a Campaign mek Congress Legislature Party (CLP) Leader leh MPCC Treasurer ni bawk Pu Zodintluanga Ralte chuan 28 April, 2022 zan dar 7 khan Siaha South II candidate Pu K.H. Beihlo Campaign Office hawnna neiin, Congress chu Mara ram hmasawnna tur leh mirethei thleng phak policy siam thin party a ni a ti.
Pu Zodintluanga chuan Mara mipuiten duhsak taka Congress an vote tling thin chu lawmawm a tih thu a sawi a. Congress party chu a thutiamah a ding nghet thin a, Mara ram hmasawnna leh mi rethei thleng phak policy pawh a taka kalpui thin kan ni a ti. Pu Zodintluanga chuan MNF chu SEDP nuai 3 sem an tiam vanga sorkar an a, SEDP an kalpui mek dan erawh mipui chân loh khanah a lo chhuak thung a ni a ti.
Pu Mama chuan, “SEDP vaimin chi an sem mek chu an kalpui dan a mak em em mai a, thlawhhma la miahlo mi enge maw zat hnenah vaimim chi semin chhungkaw tam takin hmalak ngaihna an hrelo a. Ran chaw atana pek dawnin damdawi nena sawngbawl a ni bawk si, mihring ei tlakah an ngai bawk si lo. Vaimim chi dawng tam tak chuan tih ngaihna hrelo in an chawk let an chawk let mai a ni” a ti. Pu Mama chuan “Vaimim chi an sem zawhah hian Telhawng, Kaikuang leh Chengkawl te an rawn kalpui leh dawn ni awm tak a ni” a ti a, cheng nuai 3 sem tura intiamte chet hmang atang hian MNF party rintlak loh zia a lang chiang hle a ni a ti bawk.
Pu Zodintluanga chuan, “Congress party chu insiamtha chho in President thar Pu Lalsawta ho in kan tho kang leh mek a. Mipuiin min hnawl chang awm mahse Congress party chu a tho chhuak leh thin a. ZPM leader Pu Lalduhawma erawh a pawl awmna apiang mipuiin an la hnawl char char a, ZPM te hi Zoram mipui hnawl zin ber Leader hnuaia awm mek an ni” a ti. Mara Autonomous District Council huam chhunga mipuite chu Congress party candidate vote turin a sawm theuh bawk a ni.
