October 6, 2023 (Zirtawpni) hian Pu Lalsawta chuan Bethlehem Vengthlang Congress Group Congress Committee Campaign Kick-off, Bethlehem Vengthlang YMA Office a neih a hmanpuina ah thu sawi in, “Politics ram hlui ah hian thenkhat chu kan cheng mek a, pawisa ngah leh pawisa beiseitu ten kan ram rorelna an luah hi kei zawng ka ngaingam lova, ka phal lo a ni. Congress erawh chuan pawisa thiltihtheihna kan hmang ve dawn lo, Congress thar kan ni tawh.
“He ram hi lawng pil mek ang a ni a, kan ram dinhmun hi a tha lo a ni. Lawng pil mekah chuan pindan tha zawng mah ila, a pil dawn tho tih kan hriat a ngai. Chu lawnga kan pil mai loh nan leh kan boral loh nan mipuiten ngaihtuahna kan hman a, sum thiltihtheihna kan danchah a ngai a ni.
“Party thenkhat chuan hmanrua atan ‘Sum’ hman an tum a, keini chuan kan nei ve lo. Kan hmanraw neih chhun chu Pathian a ni. He inthlan hi sum hmanga indona anih kan phal tur a ni lo a, sum hmachhuan tute chu lo hnawl rawh u.
“Mizote hi hnam taima, hnam rintlak kan ni thin. Vawin ah hian kan hnam lungphun a nghing mek a ni. Kan sakhua a him lova, kan ram ngeiah min nekcheptu an awm mek a ni. Kan Missionary te pawh koh haw an ngaih hun a la thleng ang. Chuvangin kan Mizo-na humhim tur leh kan Sakhuana humhim tur Congress party hi mipuiten min sawrkar tir leh a ngai a ni.
“Vawiinah hian MNF chuan BJP an thawhpui duh a, kan Lok Sabha MP ngei pawhin Parliament ah ngei pawh CAB a thlawp anih kha. A Campaign lai, mipui min mamawh lai chuan mipui thlavang a hauh ngam a, mahse mipui a mamawh tawh loh hnu chuan BJP a thlawp mai a ni. ZPM pawh hian a ruk a ralin BJP thawhpui an tum mek bawk a. BJP dodal thei tu chu Congress chauh kan ni tih mipui hian kan hriat a ngai a ni.
“Chuvangin kan ram, kan hnam, kan sakhua a him nan leh Aizawl S I hmasawn nan Pi Vanlalawmpuii Chawngthu, INC Official Candidate hi lo vote vek turin ka sawm che u a ni” a ti.
He hun hu Pu Lallawmzuala, Bethlehem Vengthlang Congress Group Vice President chuan a kaihruai a, Pi Vanlalawmpuii Chawngthu Aizawl S I Congress Official Candidate, Pu R. Vanlalvena G/S MPCC, Pu LC Tluanga leh Pu P.C Malsawma President, Aizawl S I Block Congress Committee ten thu an sawi bawk a ni.
