ZPM Thalaite chuan vawiina thuchhuah a siam ah, “CAG Report no. 2 of 2021-a a lan dânin,Congress hunlai khan Mizoram Youth Commission hnênah ‘Capacity Building and Technical Assistance Scheme’, hnuaiah March 2017 khan cheng 1.32 crore chu Ministry of DoNER-in a release a ni.
“Amaherawhchu, Congress sawrkâr laia heng MYC sum-te hi nasa taka hman sual a nih thu CAG report hian a târlang a ni. MYC hian Mizoram sawrkar hnuaia department hrang hrang 48 atangin group B leh C mi 1,499 te hnenah April 2017 – May 2018 inkâr khan ni 21 chhûng ṭheuh computer class an kal tih ziahna loose attendance sheets chu Audit hma ah an phawrh a. Audit hian Department 48 hnênah verification request thawnin, verification request hi department 3 (FCS&CA, H&FW leh PWD) -in an chhâng lo a ni. Department 45 in chhânna an pêkna aṭangin training kal ni-a târlan mi 1499 aṭang hian mi 1,300 zet chu department-ah an hming a taka hmuh tur awm lo an ni a, mi 7 chiah a taka department-a an hming hmuh tur awm niin, chung zinga 2 pawh chu training tura an hming thlan zîngah an la tel lo cheu bawk a ni. Report thehlut ve lo department 3 aṭang hian mi 199 an training thu târlan a ni a, heng ho pawh hi hming lem bawk an ni thei mai ang em? tih hian ngaihtuahna a tithui hle. He thilah hian sawrkâr sum cheng nuai 113.92 hi dik lo taka hman a ni.
“Opposition an nih hnua a ṭha ber niawm taka ‘That loh theih lohna bawm’ hmanga rawn inzuarte hi an ruling laia an sapatal dan kha Zoram mipuite hian kan theihnghilh lova, Congress sawrkar hunlaia mipui sum cheng nuai 113.92 hman khaw lohna pawh hian mipuite rilru a tina em em a; Congress hunlaia mipui sum hman khaw lohna kawnga inhnamhnawih-te’n hremna an tawh ngei theihna turin ZPM Thalai chuan Mizoram Lokayukta-ah FIR kan thehlût a ni. Congress hi opposition-a an awm chauhin an ṭha a, opposition-a an awm hian ṭhat loh theih lohna bawmah kan khung khawm a nimai tih hi ZPM Ṭhalai ngaihdan a ni,” a ti bawk.
