Jairam Ramesh, General Secretary i/c Communication, AICC leh Former Union Minister chuan vawiin Oct. ni 27. 2023 khan Aijal Club Curry Pot-ah chanchinthar lakhawmtute kawmin, “Congress sawrkar-a Manmohan Singh sawrkar project lian tak pakhat KMMTTP Road hi BJP leh Narendra Modi hian an hlawkpui a, a nihna takah chuan a bul tantu leh ngaihtuahchhuaktu chu Congress sawrkar a ni a, 2007 atanga he project hi bultan a ni,” a ti.
Jairam Ramesh chuan, “BJP hian Mizoramah hian thawhpui pahnih an nei thei. MNF hi kan hre sa a, ZPM pawh hian thawhpui an hnial lo a ni. ZPM hi pawl thar an ni a, an pawl kalphung te, an policy te-ah thil thar a awm lova, enchhin bak hi sawi tur an nei lo. Tun hi hun harsa a ni a, inenchhin hun a ni lo.
“BJP hian mipui min thenhrang a, kan chungah an duh anga rorel an tum a ni. MNF leh ZPM hi chu BJP lo luhna hmanrua tur an ni. BJP hian Constitution Article 370 an nuaibo thei anih chuan Article 371(G) pawh an nuaibo thei a ni tih kan hriat a ngai a ni. J&K inhung bikna Article 370 an nuaibo a, Nagaland chungchang pawh sawiho mek a ni a, keini hi kan him rei dawn lo. Kan inhungbikna hi hnawk an ti em em a ni.
“BJP hian an tum chu ‘One Nation’ a ni a, kei ni ho pawh hi chu huangah chuan min telh an tum a ni. Diversity an tih, kan in unauna te hi tichhiatin a awm a, tawng khat min hman tir am tum a.
“Forest Conservation Amendment Act an pass te kha Parliamentary Committee on Environment, Chairman ka nihna a kaltlang tur a ni a, mahse an kaltlang tir lo. He dan hian Mizo Tribal te a tibuai dawn a, BJP hian an pawng nek tawp mai che u a ni. MNF ho hian hemi chungchang hi an sawi ngai lo a ni.
“Nakum Lok Sabha inthlan hi Congress hun lo herchhuahna tur a ni. India mipuite hian inhuatna politic te, inthendarhna politic te, tharum thawhna politic te hi an duh tawhlo a, an hnawl tawh a ni.
“SEDP pawh State Empty Development Project a ni zo tawh a. Mizoram sawrkar hian Fund vaibelchhe 3500 vel lai agriculture, health etc. a hman tur te dan ang takin dawn belh theihna a nei a, mahse Central BJP sawrkar hian a pe lo a ni. Heng te hi a pek loh chhan hi MNF Sawrkar nep vang a ni.
“Mizoram hian a mamawh chu ‘aggressive marketing’ a ni a, customer te hnen thleng tura inbiakna mumal leh a taka hralh chhuah tur thil siamchhuah leh tharchhuah a ni.
“Mipui te hian cashless health care nuaih 15 thleng an nei dawn a, chu chu Karnataka ah te, Rajasthan ah te, Chhatiagarh ah te kalpui a ni a, Madhya Pradesh ah pawh kalpui kan intiam a ni. Hei hi kan ti thei a, a ngaihna kan hria a, tawnhriat pawh kan nei a ni.
“Tun hun hi sawrkar thlak hun a ni a, Mizoram a thil lo thleng hi India ram pum tan pawh nghawng na tak nei tur a ni. Tun hnaiah BJP in mipui an thenhrang a, kan zalenna n tibuai tur hi kan phal tur a ni lo. MNF leh ZPM hi BJP lo luhna hmanrua an nih dawn tih pawh kan hre reng tur a ni,” a ti bawk.
