Vawiin October 30, 2024 khan Asian Armwrestling Championship, 2024 Mumbai-a Below 80 kgs-a India aiawha kal Denic Lalruattluanga, ITI Veng chuan Gold Medal a lak chu Congress Party chuan lawmpuina hun an hmang.
He hunah hian Dr. Lalmalsawma Nghaka, Treasurer, MPCC leh MPYCC Gen Hqrs leh Aizawl S-II Block Congress Committee ten Citation, sum fai, pangpar leh dekchi lian nen lawmpuina hun hi an hmang a ni.
He hunah hian lawmman dawngtu Denic Lalruattluanga pawhin lawmthu sawiin, an lar chhuah hma, a career bul an tan chhoh dawna National level-a a kal hmasak berna atang tawhin Dr. Mala’n an kalna tur senso a lo tum sak thin tih sawiin, tun thlenga a ngaihsak chhunzawm zel chu lawmawm a tih thu a sawi.
Dr Mala chuan, “Denic-a hi an chhuan thu leh, kan ram leh ITI Veng tan mai ni lo, khawvel huapa hmun hrang hranga Mizo awmte ti hmingthatu a nih bakah, a mizia leh a inngaihtlawm thiamnaah te hian Mizo zemawi dik tak ti langchhuaktu a ni,” a ti.
Dr Mala chuan kan thalai ten an thiam thil hmanga kan hnam an tihmingtha thin leh an thalaipuite tan chona thar an rawn siam thin hi a lawmawm kan ti a, kan hnam mai ni lo, an nu leh pa te leh a pawimawh berah kan biak Pathian an ti hmingtha thin hi a lawmawm hle a ni. Sawrkar pawh hian tun aia nasa in chawimawiin, a achievement ropui tak hi lawmpuiin chhawmdawl se, a ti bawk.
Dr. Mala chuan Denic-a hi Kum naupangte Kum 24 chauh a la ni a, chuti chunga Asian khawmual hi he Mizo tlangval hian a hneh chho der tawh a ni. A kum lam a upa deuh hret ang a, thapui a la nei dawn chauh a, Asia khawmual mai ni lo khawvel huap Arm Wrestling hi a la thunun thei a ni tih kan hria, a hma hun a eng a, tha thlah lovin in sum theihna nen, tum ruhna leh Pathian tihna nena kal chho zel turin ka duhsak a ni, a ti.
He lawmpuina hunah hian Congress Thalai pawhin Denic Lalruattluanga an chhuan thu sawiin, Mizo Thalaite tan entawn tlak leh Thalaite tan a IDOL a ni thei hi a lawmawm an tih thu an sawi a ni.
He hunah hian MPYCC General Hqrs. aṭangin Pu Ngurdingpuia Pachuau, Sr. Vice President, Pu Lalsanglura Sailo, Vice President, Pu Khawpuimawia, Treasurer leh Pu H Lalduhawma, President Aizawl South-II Block, ITI Veng Joint Congress Unit leh Congress Party hruaitu dangte an tel a ni.
