October 4, 2023 (Nilaini) hian Kolasib District Congress Conference, Diakkawn YMA Hall, Kolasib-ah hman a ni a. He hun hi Pu Lalsawta, President, MPCC in a hmanpui a. Mithar thahnem tak a lawmlut bawk.
He huna thusawitu Pu Lalsawta, President MPCC chuan kumin inthlan zet chu Mizoramin Change kan hmu dawn a. Chu change chu Congress in Mizoram tana sorkar tha pek kan duh avanga kan thlen tir a ni ang. Kolasib District-ah a takin kan hmu nghal a. Mizoram Thalai te’n an beisei ram hruaitu tura thalai an duhna chu Kolasib District-ah a takin a lang chhuak a. Vawiinah hian Congress thar Mizoramin an hmu ta. Tuna Mizorama Congress lo danglam ta hi kan duh dan tak a ni, a ti.
Pu Lalsawta chuan, Politics ram hluia cheng ten pawisa an hmachhuan a. Keini chuan Lalpa, he khawvela a Lal ram din tura min dah tu lam a ni kan hawi ni. MNF ten rethei te retheihna chu bahhnukte ang maia ngaiin cheng 25,000 an tawktarh che u hian in dinchhuahna tur a thlen dawn chuang lo. Tuna BJP leh a thawhpui MNF te leh BJP thiana siam tum mek ZPM Party-ah hian kan ram dinhmun a thim hle. Kan ram, kan hnam, kan sakhaw nuaibo tumtu, BJP hi i do ang u. BJP thawhpui ngai lo tur Congress hi kan Pathian hmanruaah i ngai ang u. Central-ah tangrual I.N.D.I.A an chak ngei dawn a. India ramah thlamuang takin Pathian ram chanchin tha kan hril leh ang, a ti.
Pu Lalsawta chuan, Duhdah taka sum enkawl avangin Mizoramin leiba kan ngah hle a. Naupiang hlim hnute tui chauh la ring pawhin leiba sing tel nei ang zel kan ni. Congress Party a sorkar chuan Mizoram sum kan siam tha ang a, Mizoram mipuite tan ‘Tang Puihna’ hmangin mipui dinhmun kan siam tha ang a. Old Pension Scheme tha takin kan kal pui dawn a ni, a ti.
Pu Lalsawta chuan, Kum 2023 inthlan hi ram roreltu thlanna a ni mai lo, Lalpa indona a ni, tih sawiin, A chakna ringin A lam kan hawi a, he leia A Lal ram din a, ro min rel sak turin a duh dan angin he inthlan hi Congress chuan a hmachhawn dawn. Thlarau thianghlimin mipuite thinlungah hna a thawk a. Mi tha leh rintlak tak takin Congress an zawm zel. Pathian duhdan taka inthlan kan hmachhawn dawn avang hian kan sorkar ngei dawn tih hi ka ring tlat a ni. Hei hi Congress tan a ni lo, Pathian ropui nan, Mizoram mipuite tan a ni. Hmasawnna nghet leh sorkar nei a, kan ram kan hnam humhim a nih theihna tur kal kawng hmasa atan Kolasib District mipuiin Congress Candidate Pu S. Lalrinawma, Pu Anggu Lalhmachhuana, Dr. Henry Zodinliana Pachuau te intan, inthlan tlin ngei a ngai a ni, a ti bawk.
He hun hi Pu Lalthanpuia Khawlhring, GS ADCC in a kaihruai a. Upa C. Lalthlamuana’n hunserh a hmang a. Kolasib INC Candidate Pu S. Lalrinawma, Serlui INC Candidate Pu Anggu Lalhmachhuana, Tuirial bial INC Candidate Pu Henry Zodinliana Pachuau, Pu LC Tluanga leh Pu K. Vanlalhruaia, Vice President, ADCC ten thu an sawi bakah Pi Lalenkawli Pautu leh Nl. Grace Lalchhanhimi te’n zaiin kal khawm mipuite an awi a. MPCC General Headquarters atangin MPCC Hruaitu engemaw zatin he hun hi an hmanpui bawk a ni.
