Vawiin khan ZPM General Heaquarters chuan Party Pisa ah chhung inkhawm an hmanga, he huna thusawitu Supply Minister B.Lalchhanzova chuan, Mizoramin kalphung hlui Sorkar ang kha kan neih leh a hlauhawm thu bakah Congress leh MNF te hi an thawkho zel dawn em? tih chu zawhna lian tak a nih thu a sawi.
Aizawl East-II Bialtu MLA B.Lalchhanzova chuan, “Kum 37 zet kan ram lo hruaitu Congress leh MNF Party-te kha ZPM Party lo pian hma zawng kha chuan Ui leh Kel thlun pawlh ang maiin an in hal thin hle a, chu chuan politics tuinu hringchhuakin mipuite min ti chiai hle thin a, kalphunghlui Sorkar ang kha neih leh hi a hlauhawm hle a ni. ZPM Party lo pian hnu khan nasa taka inbei thin party pahnih te inbakkaihna thawm a reh chho tan ta a, eptu party a an han awm dun meuh chuan an dinhmun an hrechiang ta a niang, inbauh chu sawi loh, Party khata inchhun fin an tum emawni, tih tur khawpin kan hmalawka AMC inthlan lo awm turah pawh seat insema thawkho turin an in be mek tih thawmte a awm ta zel a, tu zawkin nge Seat chang hnem zawk ang le? Tin MLA inthlan thlengin lo thawkho zel pawh nise tu Party zawkin nge CM Candidate chang ang tihte hi an buaina lian tak tur a ni. Chuvangin Congress leh MNF Party te hi an thawkho zel dawn em? tih hi zawhna lian tak a tling a ni,” a ti.
Minister chuan, “Kum 2025 VC/LC inthlan ah khan Congress leh MNF te hian ZPM Party nasa takin min beihrawn a nih kha, hei hian party lian pahnih ten inrintawkna an tlakchham zia a ti lang chiang hle a, tin mipuiten heti taka Party lian pahnih ten an teirei peih lo leh an zam hma lutuk kha mak an ti hle a ni. Hei hian ram an lo hruai tawh dan leh an hnathawh ten inrintawkna a pe lo tih a chiang em em a, hnuhma pawr an ngah em avangin ZPM lo sawrkar ta hian a vau zam ta niin a lang. ZPM party in kan duh loh ber, a thlawna pawisa sem leh vote zawn nana hman chu party pahnih te khan hmanraw pui berah an nei a, state pachhe takah min siam a, intodelhna sawi tur awm mang si lo in kum 37 chhung kan ramah ro an rel a, tunah pawh sum sem tur intiam pun siak bak hi an rilruah a awm pha lo niin a lang, sorkar lai beihna bak au hla tha zawk vawiin thlengin an la nei thei lo a ni,” a ti.
Revenue minister chuan, “Sorkar hnathawk ten Ram hmangaihtu tak tak ministry hmu tawh lo tura an inngaih laia Pu Lalduhoma kaihruai ZPM ministry a lo piang hi an phur thar hle a, hna thawh turin a hmuaka, an mahni tul leh pawimawh ti hman lo khawpin thahnem an ngai thin a ni. Induhsakna uchuak leh Sorkar hnathawkte kut phuarsak a bo a, dan hnuaiah thil a nih dan turin a kal chho mek a, a hlawhtlinna kan chhiar chho mek a ni. Hengte hi kan minister ten huaisen taka hma an hruai vang niin Sorkar hnathawk ten an sawi hi thil lawmawm tak a ni. Zofa tlang hrang hranga chengte hian ZPM Ministry hi an inti neitu em em a, thalai hna zawng mekte an ngaih a tha a, ZPM Party ah hmeichhia ten an thawhhlawk em em a, kum upate an tlangnel a, he party tluka kuthnathawktute ngaihsak tak tak an la awm lo tih hriain kuthnathawktute pawhin ZPM Party lam an hawi zel tawh a ni,” a ti. Fuihna thu sawiin, “Mizote hian dam rei kan tum angai a, kan duh duh kaa barhluh hi i sim ang u, kum 70 tal lawm theuh thei turin kan taksaiI duat ang u. Nu leh pa, pi leh pu te pawhin kan tu kan fate ruihlo ngai an awmin kan mawhphurhna ah i la ngam ang u, kan enkawl tura Pathian min pek an ni a, midang kuta hlan mai i ching lo ang u,” a ti bawk.
