Vawiin chawhnu khan Thorang Bialtu MLA Zodintluanga Ralte, CLP Leader leh West Tuipui bialtu MLA Nihar Kanti Chakma-ten NH 302, Lunglei aṭanga Tlabung kawng siam mek chak zawka hnathawh a nih theih nan; NHIDCL Executive Director (Projects) Virindra Kumar Jakhar, chu Tuikhuahtlang, Aizawla NHIDCL Regional Office-ah an hmu.
MLA pahnihte hian Lunglei-Lungsen-Tlabung Road siam mekah hian hnathawktu leh a enkawltute hnenah vawi tam tak chak leh tha zawka thawk turin an lo thlen tawh thin a.
Heti chunga tun dinhmuna mipui ni tin ei tur mamawh lakluhna thlenga harsatna a thlen tak zui zel avang hian, chak leh zuala hnathawktute nawr turin NHIDCL Executive Director (P) hi intiam rualin Congress MLA pahnihte hian a Office-ah an hmu a ni.
NHIDCL Executive Director (P) Kumar Jakhar chuan, Kan dinhmun hi hrehawm kan ti hle. Contractor inthlak leh ruahtui avangin harsatna nasa tak kan tawk a, Lungsen to Tlabung kawng dinhmun hi ni tin kan zawtin kan buaipui reng a. Chak lehzualin hma kan ka ang a, theihtawpin hma kan la ang, a lo ti.
MLA ten Contractor hmasa hnuaiah Sub-Contractor-te bill pek chungchang an zawhna chhangin, NHIDCL Executive Director chuan, October 2023 hi chuan a nawlpui tihfel kan tum ang, a ti a. Tuna Contractor chu nasa taka hnathawhah an enpui avangin NHIDCL General Manager pawhin a vil tih a sawi a, September ni 20, 2023 hian Lunglei DC te nen pawh inhmuha lirthei leh mipui kal dan tur ruahmanna siam an tum thu a sawi.
Congress MLA pahnihte hian mipui harsatna nasa tak tawkte dinhmun chu ngai pawimawh a, Lunglei to Tlabung, National Highway 302 chu a bik taka ngaihven zual turin an ngen a ni.
