Lalduhoma, ZPM Leader leh ZPM General Headquarters hruaitute chuan Champhai North Constituency huamchhung an tlawh zel a, vawiin khan Khuangphah leh Vaikhawtlang khuate tlawhin vantlang inkhawm an nei a ni.
Lalduhoma chuan, “ZPM hi party thang duang ber kan ni a, party pahnih ten hun rei tak min kaihruai a, an theihna te kan hre vek tawh a ni. America ramah te chuan an President ten term hnih bak chelh an phal lo a, an term a zawh tawh chuan hruaitu tharin rilru thar nen an ram kaihruai turin an duh a ni. Kan ramah pawh Kohhran leh NGO te chu a hruaitu hi rei tak awm a rem lo kan ti thin a, Politics-ah erawh hruaitu ngai rei tak kan nei ngat ngat mai a, anmahni tan hlawk mahse mipui tan a hlawk ve ta lo va, tunah hian Congress ni lo MNF ni lo sawrkar kan mamawh tih hi mipuite rilru a lo ni ta a ni. Kan khingpui lamah hian Party ruh kawl mi tlemtein rorêl an tum a, chu pawh chu mahni tanghma hai duh te chauh an ni,” a ti.
ZPM Leader chuan, “Kan party a mi thiam te nen kum hnih chhung uluk takin kan policy kan zir ho va, kan tih theih leh kan tih ngei ngei tur chiah kan duang a ni. Fel takin calendar kan siam a, kan sawrkar atanga ni za chhunga tih turte, kum khat chhunga tih turte kan duang lawk vek a ni. Tun hma atang khan kan budget-ah kuthnathawktute tan sum dah a ni ve ngai lo va, enkawltu neilo ang mai kan lo ni ta a ni. Chin tur min han hrilh ve bawk thin mah se a hralhna tur lam min ngaihtuah pui leh si lo va, mi hlawhchamah min siam ta a ni. Hetianga dinchhuah tuma theihtawp chhuah hi khaw khat pa hausa te kan ni deuh vek a ni, mahse khaw khat mi taima kha BPL-ah min siam der mai a ni,” a ti. “Bana kaih (Hand holding) policy kan kalpui dawn a, thlai thar kan lei dawn; kan thlai lei turte chu inthlan dawnah kan hotuten an puang dawn a ni. Sawhthing pawh hi kan sawi fo tawh a, kum engemaw chhung tal hi chu kan lei dawn a ni. Rs. 50 in kan lei dawn a, hei hi a man tlahniam tur venna chauh a ni. Hei bakah hian vegetable supply chain kan kalpui dawn a ni; lockdown laiin kan hmang a, thingtlang thlai thar chhuahte man tlawm zawkin kan lei thei a nih kha, kan thlai mante man man zawka kan hralh zui zel theih nan private enterpreneur-te nen thuthlung ziakin ruahmanna tha tak kan siam dawn a, a rate sawrkarin a thunun dawn a ni,” a ti bawk.
